దాదాపు రెండేళ్ల గ్యాప్‌ తర్వాత బుల్లెట్‌ స్పీడుతో రీ ఎంట్రీ ఇచ్చాడు మాస్‌ మహరాజ్‌ రవితేజ. ఏమాత్రం తగ్గని ఎనర్జీతో, మునుసటి ఉత్సాహాన్ని మించిన ఉత్సాహంతో బరిలోకి దూసుకొచ్చాడు. వస్తూ వస్తూనే రెండు సినిమాలను అనౌన్స్‌ చేయడం, ఓ సినిమాని పూర్తి చేయడం, విడుదల చేయడం కూడా టకటకా జరిగిపోయాయి. ఇటీవలే 'రాజా ది గ్రేట్‌' సినిమాతో ప్రేక్షకుల ముందుకు వచ్చిన రవితేజ మంచి విజయాన్ని అందుకున్నాడు. అనిల్‌ రావిపూడి ఈ సినిమాకి దర్శకత్వం వహించారు. 

కాగా ఇప్పుడు మరో సినిమాని పూర్తి చేసేస్తున్నాడు మాస్‌ రాజా. అదే విక్రమ్‌ సిరికొండ దర్శకత్వంలో తెరకెక్కుతోన్న 'టచ్‌ చేసి చూడు'. రాశీఖన్నా ఈ సినిమాలో హీరోయిన్‌గా నటిస్తోంది. దాదాపు ఈ సినిమా షూటింగ్‌ చివరి దశకు చేరుకుందట. సంక్రాంతికి ఈ సినిమాని విడుదల చేసేందుకు చిత్ర యూనిట్‌ సన్నాహాలు చేస్తోంది. సంక్రాంతి బరిలో ఇప్పటికే స్టార్‌ హీరోలైన బాలయ్య, పవన్‌ కళ్యాన్‌ ఉన్నారు. బాలయ్య 'జై సింహా', పవన్‌ కళ్యాణ్  'అజ్ఞాతవాసి' సినిమాలు సంక్రాంతికి విడుదల కానున్నాయి. అయితే తాజాగా ఈ లిస్టులోకి మాస్‌ రాజా రవితేజ కూడా వచ్చి చేరాడు. 

కథపై ఉన్న నమ్మకంతోనే ఈ సినిమాని సంక్రాంతి బరిలో ఉంచామని చిత్ర యూనిట్‌ చెబుతోంది. మంచి కథల్ని ప్రేక్షకులు బాగా ఆదరిస్తున్నారు. స్టార్‌డమ్‌తో సంబంధం లేకుండా ఆయా సినిమాలకు బ్రహ్మరథం పడుతున్నారు. అలాగే ఈ సినిమా స్టోరీ విషయంలోనూ చిత్ర యూనిట్‌ ఫుల్‌ కాన్ఫిడెంట్‌గా ఉందట. ఎలాగూ రవితేజ సినిమా అంటే ఎంటర్‌టైన్‌మెంట్‌ పుష్కలంగా ఉంటుంది. ఈ కారణాలతోనే 'టచ్‌ చేసి చూడు' సంక్రాంతి బరిలో విజయాన్ని టచ్‌ చేసేందుకు అందంగా ముస్తాబైపోతోంది.