తమిళ హీరో విజయ్‌ నటించిన 'కత్తి' సూపర్‌ డూపర్‌ విజయం సాధించింది. గ్రేట్‌ టాలెంటెడ్‌ డైరెక్టర్‌ మురుగదాస్‌ కాంబినేషన్‌లో వచ్చింది ఈ సినిమా. ఈ సినిమానే తెలుగులో చిరంజీవి 150వ చిత్రంగా రీమేక్‌ చేశారు. అదే 'ఖైదీ నెంబర్‌ 150'. కాగా మురుగదాస్‌ - విజయ్‌ కాంబినేషన్‌ ది బెస్ట్‌ కాంబినేషన్‌. ఈ కాంబినేషన్‌లో వచ్చిన మరో సినిమా 'తుపాకి' కూడా సూపర్‌ హిట్‌ సినిమానే. ఈ సినిమాని తెలుగులోకి డబ్‌ చేశారు. తాజాగా ఈ కాంబినేషన్‌ మళ్లీ సెట్‌ అయ్యింది. 

ఇద్దరి కాంబినేషన్‌లో ఓ సినిమా త్వరలోనే సెట్స్‌ మీదికి వెళ్లనుంది. ఈ మధ్యే 'మెర్సల్‌' సినిమాతో ఘన విజయం అందుకున్నాడు విజయ్‌. 'అదిరింది' పేరుతో తెలుగులో విడుదలైంది ఈ సినిమా. మురుగదాస్‌ 'స్పైడర్‌' చిత్రాన్ని తెరకెక్కించారు. సూపర్‌ స్టార్‌ మహేష్‌బాబుతో తెరకెక్కించిన బైలింగ్వల్‌ మూవీ ఇది. అయితే ఈ సినిమా ఆశించిన విజయాన్ని అందుకోలేకపోయినా, మురుగదాస్‌ డైరెక్షన్‌ అంటే అంచనాలు ఆకాశాన్నంటేలానే ఉంటాయి. అందులోనూ విజయ్‌ - మురుగదాస్‌ కాంబో అంటే అతి భారీ అంచనాలు ఇది పక్కా. 

ఈ సినిమాని సన్‌ పిక్చర్స్‌ సంస్థ నిర్మిస్తోంది. గతంలో రజనీకాంత్‌ హీరోగా తెరకెక్కిన 'రోబో' చిత్రాన్ని రూపొందించింది ఈ నిర్మాణ సంస్థే కావడం విశేషం. అంటే ఈ తాజా కాంబోలో తెరకెక్కబోయే చిత్రం అతి భారీ బడ్జెట్‌ మూవీ అని భావించొచ్చు. 'మెర్సల్‌' మూవీతో వివాదాల పాలైనా, సినిమా అయితే రికార్డు హిట్‌ని సొంతం చేసుకుంది. ఆ సినిమాతో విజయ్‌ రేంజ్‌ ఇంకా పెరిగిపోయింది. ఇక ఇప్పుడు మురుగదాస్‌తో చేయబోయే చిత్రం అంటే అంచనాలు ఊహకందడం లేదు.

సినిమాకి సంబంధించిన మిగిలిన వివరాలు త్వరలోనే వెల్లడి కానున్నాయి.