క‌రోనా వ‌ల్ల రిలీజ్ డేట్ల‌న్నీ తారు మారు అయిపోయాయి. ఎప్పుడో విడుద‌ల కావ‌ల్సిన సినిమాల‌న్నీ ఇప్పుడు మూకుమ్మ‌డిగా వ‌స్తుండ‌డంతో.. సినిమాల మ‌ధ్య పోటీ త‌ప్ప‌డం లేదు. అలా.. మెగాస్టార్ కీ స్టైలీష్ స్టార్‌కీ మ‌ధ్య... పోటీ చూసే అవ‌కాశం తెలుగు ప్రేక్ష‌కుల‌కు ద‌క్క‌బోతోంది. వివ‌రాల్లోకి వెళ్తే.. చిరంజీవి న‌టించిన చిత్రం `ఆచార్య`. ఈ సినిమా ఎప్పుడో విడుద‌ల కావాలి. అయితే లాక్ డౌన్ వ‌ల్ల వాయిదా ప‌డింది. ఈ ద‌స‌రాకి ఈ సినిమా వ‌స్తుంద‌నుకున్నారు. కానీ ద‌సరా కూడా అనుమాన‌మే. అయితే దీపావ‌ళికీ, లేదంటే క్రిస్మ‌స్‌కీ ఈ చిత్రాన్ని విడుద‌ల చేయాల‌ని చూస్తున్నారు. న‌వంబ‌రు 4 దీపావ‌ళి. ఆ స‌మ‌యానికి ఆచార్య రెడీ అవుతుంది కూడా. కాక‌పోతే.. దీపావ‌ళి టాలీవుడ్ కి పెద్ద‌గా క‌ల‌సి రాదు. ఆ రోజున విడుద‌లైన సినిమాలు హిట్ట‌యిన దాఖలాలు పెద్ద‌గా లేవు. అందుకే.. క్రిస్మ‌స్ కి షిఫ్ట్ అయ్యే అవ‌కాశాలున్నాయి.
అయితే అదే క్రిస్మ‌స్ కి `పుష్ష` పార్ట్ 1 రెడీ అవుతోంది. రెండు రోజుల తేడాతో ఈ రెండు సినిమాలు విడుద‌లైనా.... బాక్సాఫీసు ద‌గ్గ‌ర దాన్ని పోటీ అనే అంటారు. అయితే చిరు సినిమాకి పోటీగా బ‌న్నీ త‌న సినిమాని రంగంలోకి దింపుతాడా? అనేది అనుమాన‌మే. కాక‌పోతే.. ఇప్ప‌టికే పుష్ఫ రిలీజ్ డేట్ బ‌య‌ట‌కు వ‌చ్చేసింది. ఈ సినిమాని క్రిస్మ‌స్ కి విడుద‌ల చేస్తామ‌ని చిత్ర‌బృందం తేల్చి చెప్పింది. ఇప్పుడు దానిపై ఆచార్య‌ని పోటీకి దింపుతారా? అన్న‌ది పెద్ద ప్ర‌శ్న. ఒక‌వేళ.. పుష్ష‌కి పోటీ వ‌ద్ద‌నుకుంటే.. ఆచార్య‌ని దీపావ‌ళికే సిద్ధం చేయాలి.
