మెగా ఫ్యామిలీ నుంచి వస్తున్న కొత్త హీరో వైష్ణవ్ తేజ్ త్వరలో 'ఉప్పెన' సినిమాతో ప్రేక్షకులను పలకరించబోతున్నాడు. బుచ్చిబాబు సాన దర్శకత్వంలో తెరకెక్కిన ఈ సినిమాను మైత్రి మూవీ మేకర్స్, సుకుమార్ రైటింగ్స్ వారు సంయుక్తంగా నిర్మించారు. ఈ సినిమా వేసవిలోనే ప్రేక్షకుల ముందుకు రావాల్సి ఉన్నప్పటికీ కరోనా క్రైసిస్ కారణంగా వాయిదా పడింది. థియేటర్లు తెరిచిన తర్వాత ఈ సినిమాను రిలీజ్ చేసేందుకు నిర్మాతలు సన్నాహాలు చేస్తున్నారు.
ఇదిలా ఉంటే ఈ సినిమా రిలీజ్ కాకముందే వైష్ణవ్ తేజ్ రెండో సినిమా కూడా ఫిక్స్ అయిందని సమాచారం అందుతోంది. ఈసారి వైష్ణవ్ తేజ్ సినిమాను అల్లు అరవింద్ గారు నిర్మించేందుకు రెడీ అవుతున్నారట. జీఎ2 పిక్చర్స్ బ్యానర్ పై ఈ సినిమాను నిర్మిస్తారని సమాచారం. ఈ సినిమాతో ఓ నూతన దర్శకుడు టాలీవుడ్ కు పరిచయం అవుతున్నాడట. ఇప్పటికే స్క్రిప్ట్ కూడా లాక్ అయిపోయిందని, త్వరలోనే ఈ సినిమాకు సంబంధించిన ప్రకటన రానుందని సమాచారం.
మొదటి సినిమా రిలీజ్ కాకముందే రెండో సినిమా ఖరారయింది అంటే గొప్ప విషయమే అని చెప్పుకోవాలి. మరి మొదటి సినిమా 'ఉప్పెన' తో వైష్ణవ్ ప్రేక్షకులను మెప్పిస్తాడా లేదా అనేది వేచి చూడాలి.
