అల్లు అర్జున్ - హరీష్ శంక‌ర్ కాంబినేష‌న్‌లో రూపుదిద్దుకున్న సినిమా `దువ్వాడ జగన్నాథమ్`. అప్ప‌ట్లో క‌మ‌ర్షియ‌ల్ గా హిట్ట‌య్యింది. ఇప్పుడు ఈ సినిమాని బాలీవుడ్ లో రీమేక్ చేయ‌డానికి స‌న్నాహాలు జ‌రుగుతున్నాయి. హరీష్ శంక‌ర్ స్వ‌యంగా ఈ చిత్రానికి ద‌ర్శ‌క‌త్వం వ‌హిస్తారు. దిల్ రాజు నిర్మాత‌గా వ్య‌వ‌హ‌రించ‌బోతున్నారు. ఇప్ప‌టికే స్క్రిప్టు ఫైన‌ల్ అయ్యింది. త్వ‌ర‌లో ఓ అగ్ర హీరోకి ఈ క‌థ చెప్పి, ఓకే చేయించుకోవాల‌ని దిల్ రాజు ప్ర‌య‌త్నిస్తున్నారు. బాలీవుడ్ నుంచి రెండు మూడు మంచి ఆప్ష‌న్లు కూడా వ‌చ్చాయ‌ని తెలుస్తోంది.
`గ‌ద్ద‌ల కొండ గ‌ణేష్‌` త‌ర‌వాత... హరీష్ శంక‌ర్ నుంచి సినిమా ఏదీ రాలేదు. ప్ర‌స్తుతం ప‌వ‌న్ తో ఓ సినిమా చేయాల్సివుంది. అది కొంచెం లేట్ అయ్యేలా క‌నిపిస్తోంది. కాక‌పోతే.. ప‌వ‌న్ తో సినిమా అయ్యాకే... దువ్వాడ జగన్నాథమ్ ని బాలీవుడ్ లో రీమేక్ చేస్తార్ట. ప్ర‌స్తుతం.. `ఏటీమ్‌` అనే ఓ వెబ్ సిరీస్ కి క‌థ అందించాడు హరీష్. అది కాకుండా సునీల్ న‌టిస్తున్న `వేదాంతం రాఘ‌వ‌య్య`కీ ఆయ‌నే క‌థ అందించారు. ఈ రెండు చిత్రాలూ ఇప్పుడు నిర్మాణ ద‌శ‌లో ఉన్నాయి.
