విడుదల తేదీ దగ్గర పడుతున్న కొలదీ, 'సాహో' ప్రమోషన్స్‌ అదరగొట్టేస్తున్నారు. పోస్టర్స్‌ మీద పోస్టర్స్‌, వీడియో సాంగ్స్‌ వదులుతూ సినిమాపై అంచనాలు పెంచేస్తున్నారు. ఇక ప్రబాస్‌ ఇంటర్వ్యూలు ఫ్యాన్స్‌ని ఉర్రూతలూగిస్తున్నాయి. ఇదిలా ఉంటే, తాజాగా 'బేబీ ఓన్ట్‌ యు టెల్‌ మీ..' అనే వీడియో సాంగ్‌ని వదిలారు. 'సాహో'లోని నాలుగో పాట ఇది. ఇంతవరకూ వదిలిన మూడు పాటలు ఒకెత్తు. ఈ పాట ఇంకో ఎత్తు అనేలా ఉంది.
విజువల్స్‌ కళ్లు చెదరగొట్టేస్తున్నాయి. 'సాహో'ని వ్యతిరేకించే వాళ్లెవరైనా ఉన్నా, ఈ సాంగ్‌ వీడియో చూసి ఫ్లాట్‌ అవ్వాల్సిందే. ఆ రేంజ్‌లో భారీ విజువల్స్‌ చూపించారు. ఇక ప్రబాస్‌, శ్రద్ధా కపూర్‌ మధ్య కెమిస్ట్రీ ఈ పాటలో హైలైట్‌గా నిలిచింది. భారీ బడ్జెట్ అంటే ఇదే.. అనేలా 'సాహో'ని రూపొందించారనడంలో అతిశయోక్తి ఎంత మాత్రమూ కాదనిపిస్తోంది. ఇక బాలీవుడ్‌ నటీ నటులు ఈ సినిమాలో చాలా ఎక్కువగా కనిపిస్తున్నారన్న ప్రశ్నకు ప్రబాస్‌ నుండి వచ్చిన సమాధానం. సినిమా తెలుగు సినిమా.
డైరెక్టర్‌ మొదలుకొని, హీరో, మురళీ శర్మ తదితరులు తెలుగు వాళ్లే ఉన్నారు. అలాగే అరుణ్‌ విజయ్‌ వంటి తమిళ ఆర్టిస్టులు కూడా ఉన్నారు. మా అందరితో పాటు, బాలీవుడ్‌ నుండి మరికొందరు ప్రముఖ నటీనటులు కూడా ఈ సినిమాలో నటించారు. తెలుగు సినిమానే అయినా, ఇండియన్‌ మూవీ.. అనే ఫ్లేవర్‌ వచ్చేలా పలు భాషల నుండి నటీనటుల్ని ఎంచుకోవడం జరిగింది.. అని ప్రబాస్‌ చెప్పాడు. సుజిత్‌ దర్శకత్వం వహించిన ఈ భారీ బడ్జెట్ మూవీని యూవీ క్రియేషన్స్‌ సంస్థ ఏమాత్రం రాజీ పడకుండా నిర్మించింది.
