బెల్లంకొండ సాయి శ్రీ‌నివాస్ - వినాయ‌క్ కాంబినేష‌న్‌లో `చ‌త్ర‌ప‌తి` హిందీ రీమేక్ రూపొందుతున్న సంగ‌తి తెలిసిందే. బెల్లంకొండ‌కు ఇది బాలీవుడ్ డెబ్యూ. ఈ సినిమా కోసం... బెల్లంకొండ హిందీ పాఠాలు కూడా నేర్చుకుంటున్నాడు. త‌న పాత్ర‌కు తానే డబ్బింగ్ చెప్పాల‌నుకుంటున్నాడు. అయితే.. ఈ సినిమాని తెలుగులోనూ విడుద‌ల చేస్తార్ట. తెలుగు వెర్ష‌న్ సైతం హిందీతో పాటు గా విడుద‌ల అవుతోంద‌ని స‌మాచారం. అంటే ఓ ర‌కంగా ఇది తెలుగు - హిందీ సినిమా అన్న‌మాట.
`ఛ‌త్ర‌ప‌తి` వ‌చ్చి చాలా ఏళ్ల‌య్యింది. ఆ సినిమాని చాలాసార్లు టీవీల్లోనూచూసేశారు. అయితే ఏ ధైర్యంతో తెలుగులో విడుద‌ల చేస్తున్నారు? అనే డౌటు వ‌స్తుంది. అయితే నిర్మాత‌ల ఆలోచ‌న వేరు. `ఛ‌త్ర‌ప‌తి` హిందీ రీమేక్ కోసం చాలా మార్పులు చేశారు. ముఖ్యంగా సెకండాఫ్ మార్చేశారు. ఓర‌కంగా... లైన్ అదే అయినా, కొత్త సీన్లు వ‌స్తాయి. `ఛ‌త్ర‌ప‌తి`ని మ‌ళ్లీ ఎలా తీశారో చూద్దాం? అన్న ఆస‌క్తి... తెలుగు ప్రేక్ష‌కుల‌కూ ఉంటుంది. పైగా వినాయ‌క్ తెలుగు ద‌ర్శ‌కుడే. శ్రీ‌నివాస్ కంటూ తెలుగులో మార్కెట్ ఉంది. ఇవ‌న్నీ దృష్టిలో ఉంచుకుని తెలుగు వెర్ష‌న్ ని సైతం విడుద‌ల చేయ‌బోతున్నార‌ని టాక్. బెల్లంకొండ ఉన్న సీన్ల‌న్నీ తెలుగులోనూ రీషూట్ చేస్తార‌ని, మిగిలిన పాత్ర‌ల‌కు డబ్బింగ్ చెప్పించుకుంటార‌ని స‌మాచారం అందుతోంది.
