బ్రహ్మానందం కామెడీ గురించి వేరే చెప్పనక్కర్లేదు. కామెడీ బ్రహ్మ ఆయన. టాలీవుడ్‌లో ఎంత మంది కమెడియన్లున్నా, నో డౌట్‌.. ఆయనదే నెంబర్‌ వన్‌ ప్లేస్‌. అయితే ఈ మధ్య ఆయన మూస కామెడీతో బోర్‌ కొట్టిస్తున్నారంటూ వార్తలు వస్తున్నాయి. అయితే తాజాగా ఆయన చేసిన చిరంజీవి సినిమా 'ఖైదీ నెంబర్‌ 150'తో మంచి పాత్ర దక్కింది. ఆ పాత్రతో బ్రహ్మానందం బాగా ఆకట్టుకున్నారు. గతంలో చిరంజీవి, బ్రహ్మానందం కాంబినేషన్‌లో వచ్చిన కామెడీ అదరగొట్టేలా ఉండేది. మంచి కాంబినేషన్‌ వీరిద్దరిదీ. ఆ కాంబినేషన్‌ మళ్లీ ఇన్నాళ్లకు రిపీట్‌ అయ్యింది. అలాగే చిరు రీ ఎంట్రీలో, వీరిద్దరి కాంబినేషన్‌లో పండిన కామెడీ చాలా బాగుందంటూ కాంప్లిమెంట్స్‌ వస్తున్నాయి. అందుకే చరణ్‌ సినిమాలో బ్రహ్మానందం కోసం ఓ స్పెషల్‌ క్యారెక్టర్‌ని డిజైన్‌ చేస్తున్నారట. సుకుమార్‌ - చరణ్‌ కాంబినేషన్‌లో వస్తోన్న సినిమాలో బ్రహ్మానందం కామెడీ ట్రాక్‌ స్పెషల్‌ అట్రాక్షన్‌ కానుందంటున్నారు. అలాగే చిరంజీవి నెక్స్ట్‌ మూవీ సురేందర్‌ రెడ్డితో ఉంది. ఆ సినిమాలో కూడా బ్రహ్మనందం నటిస్తున్నారు. సురేందర్‌ రెడ్డితో 'రేసుగుర్రం' సినిమాలో బ్రహ్మానందం కామెడీ ఎపిసోడ్‌ సూపర్‌ సక్సెస్‌ అయ్యింది. అదే తరహాలో ఈ సినిమాలో కూడా బ్రహ్మానందం కామెడీతో స్పెషల్‌ ఎపిసోడ్‌ ఒకటి ప్లాన్‌ చేస్తున్నారట. అంతేకాదు బ్రహ్మానందం క్యారెక్టర్‌ పేరుకు కూడా ఓ ప్రత్యేకత ఉంటుంది. క్యారెక్టర్‌ క్యారెక్టర్‌కీ సరికొత్త పేర్లతో ఆకట్టుకుంటూ ఉంటారాయన. ఖైదీలో 'డాబర్‌'గా నవ్వించారు. తాజా మూవీస్‌లో ఏ పేర్లతో నవ్విస్తారో చూడాలి.