ఎన్టీఆర్‌, రామ్‌చరణ్‌ 'బావా, బావా' అని పిలుచుకుంటారు. అంతటి చనువు, స్నేహం ఉంది వీరిద్దరి మధ్యా. ఇప్పుడు ఈ ఇద్దరూ కలిసి ఓ సినిమాలో నటించబోతున్నారంటూ ప్రచారం జరుగుతోన్న సంగతి కూడా తెలిసిందే. అది రాజమౌళి దర్శకత్వంలో ఉండబోతోందనే ప్రచారం కూడా ఉంది. ఆ విషయాన్ని రాజమౌళి అయితే ఇంతవరకూ ధృవీకరించలేదు కానీ, ఆ సంగతి అటుంచితే, తాజాగా వీరిద్దరూ కలిసి ఎయిర్‌పోర్ట్‌లో కనిపించారు. మరి ఈ ఇద్దరూ ఎయిర్‌పోర్ట్‌లో ఏం చేస్తున్నట్లు? ఇటీవలే చరణ్‌ 'రంగస్థలం' చిత్రం షూటింగ్‌ పూర్తి చేసుకున్నాడు.

ఎన్టీఆర్‌, త్రివిక్రమ్‌ శ్రీనివాస్‌ దర్శకత్వంలో చేయాల్సిన సినిమాని స్టార్ట్‌ చేయడానికి సిద్ధంగా ఉన్నాడు. ఈ తరుణంలో వీరిద్దరూ కలిసి ఎయిర్‌పోర్ట్‌లో కనిపించడమేంటని అనుమానాలు తలెత్తుతున్నాయి. ఒకవేళ ఈ ఇద్దరూ కలిసి విదేశాలకు వెళ్తున్నారా? ఏంటి అని భావిస్తున్నారు. అలాగే రాజమౌళి దర్శకత్వంలో తెరకెెక్కబోయే చిత్రానికి సంబంధించి, లొకేషన్స్‌ చూసేందుకు ఏమైనా వెళుతున్నారా? లేక ఇద్దరూ కలిసి ఈ మెగా మల్టీస్టారర్‌కి సంబంధించిన కథని వినేందుకు సిద్ధమవుతున్నారా?

ఇలాంటి పలు అంశాలు వీరి ఫోటోల చుట్టూ చక్కర్లు కొడుతున్నాయి. ఏది ఏమైనా ఎయిర్‌పోర్ట్‌లోని వీరి ఫోటోలు, వీడియోలు సోషల్‌ మీడియాలో తెగ హల్‌చల్‌ చేస్తున్నాయి. ఇదిలా ఉంటే, చరణ్‌ 'రంగస్థలం' మార్చి 30న విడుదలకు సిద్ధంగా ఉండగా, ఆ తర్వాత బోయపాటి శీనుతో సినిమాకి రెడీ అవుతున్నాడు. ఎన్టీఆర్‌ సినిమా త్వరలోనే సెట్స్‌ మీదికెళ్లనుంది.