రాక్ స్టార్ అని ఫాన్స్ ముద్దుగా పిలుచుకునే టాలీవుడ్ మ్యూజిక్ డైరక్టర్ దేవీశ్రీ ప్రసాద్ ప్రజంట్ బిజీ బిజీగా ఉన్నాడు. కెరియర్ మొదటి నుంచి అదే జర్నీ, ఎక్కడ ఒడిదుడుకులు లేవు అనే చెప్పాలి. మధ్యలో కొంచెం స్లో అయ్యి, తమన్ స్పీడ్ అందుకున్నా, మళ్ళీ దేవిశ్రీ ఫామ్ లోకి వచ్చాడు. ప్రజంట్ అరడజనుకి పైగా సినిమాలు దేవిశ్రీ చేతిలో ఉన్నాయి. పుష్ప సినిమాకి గాను నేషనల్ అవార్డు అందుకున్న ఈ రాక్ స్టార్. కేవలం సంగీత దర్శకుడిగానే కాకుండా, గాయకునిగా కూడా అలరించాడు. 19 ఏళ్లకే కెరియర్ స్టార్ట్ చేసిన దేవి ఇప్పటివరకు 100 పైగా సినిమాలు చేసాడు. 60పాటలు పాడాడు. దాదాపు 20పాటలకు సాహిత్యం కూడా అందించాడు.
దేవి మ్యూజిక్ ఇస్తే హిట్ గ్యారెంటీ . తన కెరీర్ లో ఎన్నో సక్సెస్ లు సొంతం చేసుకోవడంతో పాటు పలు బ్లాక్ బస్టర్ సాంగ్స్ ని అందించాడు. దేవి శ్రీ కంపోజ్ చేసిన పుష్ప మూవీలో సాంగ్స్ వరల్డ్ వైడ్ గా మంచి గుర్తింపుని పొందాయి. ప్రజంట్ చేతి నిండా సినిమాలతో దూసుకుపోతున్నాడు. బన్నీ 'పుష్ప ది రూల్', నాగచైతన్య చందూ మొండేటిల తండేల్, పవన్ కళ్యాణ్, హరీష్ శంకర్ ల ఉస్తాద్ భగత్ సింగ్, నాగార్జున ధనుష్ లతో శేఖర్ కమ్ముల మూవీతో పాటు, తమిళ్ లో సూర్య కంగువ, విశాల్ మూవీలు ఉన్నాయి. రానున్న సినిమాలన్నీ డిఎస్పివే.
తెలుగు, తమిళ్ లో బడా స్టార్స్, స్టార్ డైరక్టర్స్ మూవీలతో రిలీజ్ కి రెడీగా ఉన్నాడు. ఇప్పటికే ఈ సినిమాల పై భారీ అంచనాలు నెలకొన్నాయి. 2024 డైరీ మొత్తం ఫుల్ అయిపోయింది. మొత్తంగా ఈ సినిమాలతో దేవిశ్రీ మంచి విజయాలు అందుకుంటే కెరీర్ పరంగా మరింతగా దూసుకెళ్లడం ఖాయం అంటున్నారు సినీ విశ్లేషకులు.
