శర్వానంద్‌ హీరోగా తెరకెక్కుతోన్న చిత్రం 'శతమానం భవతి' సినిమాను దిల్‌ రాజు రిలీజ్‌ చేస్తున్న సంగతి తెలిసిందే. రెండు పెద్ద సినిమాలైన 'ఖైదీనెంబర్‌ 150', గౌతమీ పుత్ర శాతకర్ణి' సినిమాలతో పోటీగా ఈ సినిమా కూడా విడుదలవుతోంది. ఇద్దరు స్టార్‌ హీరోలకు పోటీగా చిన్న సినిమా అయిన ఈ సినిమాని ధైర్యంగా విడుదల చేస్తున్నాడంటేనే ఈ సినిమాపై దిల్‌ రాజుకు ఎంత నమ్మకం ఉందో తెలుస్తోంది. సతీష్‌ వేగేశ్న ఈ సినిమాకి దర్శకత్వం వహించారు. శర్వానంద్‌, అనుపమా పరమేశ్వరన్‌ జంటగా నటిస్తున్నారు. సినిమా ఔట్‌ పుట్‌ చాలా బాగా వచ్చిందట. ఇప్పటికే విడుదలైన ట్రైలర్‌ అన్ని వర్గాల వారిని విశేషంగా ఆకట్టుకుంటోంది. ఇకపోతే ఈ సినిమాకి సంబంధించి ఓ సర్‌ప్రైజ్‌ న్యూస్‌ బయటికి వచ్చింది. అదేంటంటే ఈ సినిమాలో టాలీవుడ్‌ స్టార్‌ హీరోలంతా కనిపించనున్నారట. అది ఎలా అంటే స్టార్‌ హీరోలు అంతా లైవ్‌గా తెరపై కనిపించరు కానీ, ఆయా స్టార్‌ హీరోల సినిమాల్లోని కొన్ని సీన్స్‌ని అతికించి, కంటిన్యూటీ ఉండేలా ఓ సీన్‌ తీశారట. ఈ సీన్‌ సినిమాలో చాలా బాగా వచ్చిందట. ఇలాంటి సర్‌ప్రైజులు ఈ సినిమాలో మరికొన్ని ఉన్నాయంటోంది చిత్ర యూనిట్‌. మొత్తానికి ఏదో స్పెషాలిటీ లేకపోతే ఈ సినిమాపై దిల్‌ రాజు ఇంత కాన్ఫిడెంట్‌గా ఉండడు. అయినా కథా నేపధ్యం కూడా బలంగా ఉండడంతో ఈ సినిమా సంక్రాంతి బరిలో నిలివగలిగే అర్హత ఉన్న సినిమా అయ్యింది. అంతేకాదు శర్వానంద్‌కి సంక్రాంతి బాగా కలిసొచ్చింది. గతేడాది కూడా ఇలాగే సైలెంట్‌గా రేసులో ఎంట్రీ ఇచ్చి,, గట్టి పోటీ ఇచ్చి సక్సెస్‌తో బయటికొచ్చాడు.