ఎన్టీయార్‌ హీరోగా నటిస్తున్న 'జై లవ కుశ' సినిమా ఫస్ట్‌ లుక్‌ వచ్చేసింది. టైటిల్‌తో కూడిన ఫస్ట్‌ లుక్‌ని ఈ రోజు విడుదల చేయడం జరిగింది. అయితే మోషన్‌ టీజర్‌లో ఎన్టీయార్‌ ఫొటో లేకపోయినప్పటికీ, సినిమా ఇలా ఉండబోతోందని ఓ ఫీలర్‌ అయితే అందించే ప్రయత్నం చేశారు. ఇందులో రావణాసురుడు కనిపించాడు. మొత్తం మూడు పాత్రల్ని చూపించారు. పది తలల రావణాసురుడి గురించి ఇప్పుడు సినీ వర్గాల్లో చర్చ నడుస్తోంది. ఈ సినిమాలో ఎన్టీయార్‌ ఓ పాత్రకిగాను నెగెటివ్‌ షేడ్స్‌తో కనిపించనున్నాడనే ఊహాగానాలతో ఆ రావణాసురుడు కూడా ఎన్టీయారేనని చెప్పుకుంటున్నారు. ఇంతకుముందే ఈ సినిమాకి సంబంధించిన ఓ మాస్క్‌ గురించిన వార్త హాట్‌ టాపిక్‌ అయ్యింది. అదే సినిమాలోని నెగెటివ్‌ క్యారెక్టర్‌. అయితే రావణాసురుడి తరహాలో ఆ పాత్ర ఉంటుందా? అనే అనుమానాలైతే అలాగే ఉన్నాయి. 'టెంపర్‌' సినిమాలో ఎన్టీయార్‌ విలనిజం కొంతవరకు చూశాం. ఫస్టాఫ్‌ అంతా నెగెటివ్‌ షేడ్స్‌ ఉన్న పాత్రనే 'టెంపర్‌'లో చూపించాడు ఎన్టీయార్‌. ఆ పాత్రలో నటుడిగా ఎన్టీయార్‌ చెలరేగిపోయాడు. కాబట్టి విలనిజం ఎన్టీయార్‌కి కొత్త కాదు. ఏదేమైనప్పటికీ, ఎన్టీయార్‌ త్రిపాత్రాభినయం చేస్తున్న ఈ సినిమా దర్శకుడు బాబీకి కత్తిమీద సాము వంటిదే అనడం నిస్సందేహం. నందమూరి కళ్యాణ్‌రామ్‌ ఈ చిత్రాన్ని నిర్మిస్తున్నారు.