తెలుగులో ప్ర‌తినాయ‌క పాత్ర‌ల‌కు మంచి గిరాకీ ఏర్ప‌డింది. బ‌డా హీరోల సినిమాల్లో విల‌న్ పాత్ర‌ల కోసం స్టార్‌న‌టుల్ని రంగంలోకి దింపుతున్నారు. పాన్ ఇండియా మోజు కూడా అందుకు ఓ కార‌ణం. ప‌క్క రాష్ట్రాల నుంచి విల‌న్ ని దిగుమ‌తి చేసుకుంటే... మార్కెట్ ప‌రంగానూ క‌లిసొస్తుంద‌ని, సినిమాకి క్రేజ్ పెరుగుతుంద‌ని భావిస్తున్నారు. అందుకే... ప‌రాయి న‌టులు.. తెలుగు తెర‌పై విల‌న్లుగా మెరుస్తున్నారు. వాళ్ల‌కు భారీ పారితోషికాలు ఇస్తూ.. ఆ న‌టుల అడుగుల‌కు మ‌డుగులు ఒత్త‌డానికి, ద‌ర్శ‌కులు సిద్ధం అవుతున్నారు. తాజాగా.. టాలీవుడ్ దృష్టి ఫాహిద్ ఫాజిల్ పై ప‌డింది.
కొన్ని మ‌ల‌యాళ చిత్రాల డ‌బ్బింగుల‌తో తెలుగు ప్రేక్ష‌కుల్ని ఆక‌ట్టుకున్నాడు ఫాహిద్ ఫాజిల్. ఇప్పుడు మ‌ల‌యాళంలో త‌ను ఓ స్టార్‌. `పుష్ఫ`లో ప్ర‌తినాయ‌కుడిగా ఫాజిల్ ని ఎంచుకున్న సంగ‌తి తెలిసిందే. ఇప్పుడు మ‌రో టాలీవుడ్ చిత్రంలో త‌న‌కు చోటు ద‌క్కింద‌ని టాక్‌. అఖిల్ - సురేంద‌ర్ రెడ్డి కాంబినేష‌న్ లో వ‌స్తున్న `ఏజెంట్`లోనూ ఫాజిల్ నే ప్రతినాయ‌కుడ‌ని స‌మాచారం. ఈ చిత్రంలో మ‌మ్ముట్టి కూడా ఓ కీల‌క‌మైన పాత్ర‌లో న‌టిస్తున్న సంగ‌తి తెలిసిందే. మ‌మ్ముట్టి - అఖిల్ గురు శిష్యులుగా క‌నిపించ‌బోతున్నార‌ని టాక్‌.
