కీర్తి సురేష్‌.. టాలీవుడ్ లో అత్యంత బిజీగా ఉన్న క‌థానాయిక. అయితే `మ‌హాన‌టి` త‌ర‌వాత... త‌న‌కు స‌రైన విజ‌యాలు ద‌క్క‌లేదు. సోలో హీరోయిన్ గా చేసిన `పెంగ్విన్‌`, `మిస్ ఇండియా` బోల్తా కొట్టాయి. ఈ ప‌రాజ‌యాలు... కీర్తి ఇమేజ్ పై ప్ర‌భావం చూపిస్తాయి అనుకున్నారంతా. కానీ అనూహ్యంగా, కీర్తికి మరిన్ని అవ‌కాశాలు పెరిగాయి. 2021 వ‌ర‌కూ కీర్తి ఊపిరి స‌ల‌ప‌నంత బిజీగా వుంది. ఇన్ని ఫ్లాపులొస్తున్నా కీర్తి కెరీర్ పై ప్ర‌భావం చూపించ‌క‌పోవ‌డానికి కార‌ణం... కీర్తి నిర్మాత‌ల హీరోయిన్ కావ‌డ‌మే అని టాక్‌.
సాధార‌ణంగా ఒక‌ట్రెండు హిట్స్ రాగానే, చేతిలో అవ‌కాశాలు పెర‌గ్గానే హీరోయిన్లు పారితోషికం పెంచేస్తుంటారు.కానీ కీర్తి అలా కాద‌ట. ఎప్పుడూ నిర్మాతల్ని పారితోషికం పేరుతో ఇబ్బంది పెట్ట‌లేద‌ని టాక్‌. కీర్తి పారితోషికం రీజ‌న్‌బుల్‌గానే ఉంటుంద‌ని, కాల్షీట్ల విష‌యంలోనూ ఉదార‌త చూపిస్తుంద‌ని, అందుకే కీర్తి వైపు మొగ్గు చూపిస్తున్నార‌ని టాక్‌. బ‌డా హీరోయిన్లంతా పారితోషికం పేరుతో నిర్మాతల్ని పీడిస్తూ ఉంటారు. వాళ్ల‌ని భ‌రించ‌డం కంటే, కీర్తిని తీసుకోవ‌డ‌మే బెట‌ర్ అన్న నిర్ణ‌యంలో ఉంది చిత్ర‌సీమ. అందుకే కీర్తిని ఎవ‌రూ వ‌ద‌ల‌డం లేదు. ప్ర‌స్తుతం మహేష్ బాబు సినిమా `స‌ర్కారు వారి పాట`లో న‌టిస్తోంది. ఎన్టీఆర్ - త్రివిక్ర‌మ్ కాంబోలోనూ త‌నే హీరోయిన్ అని స‌మాచారం.
