చిరంజీవి ఇప్ప‌టి వ‌ర‌కూ సీక్వెల్స్ లో న‌టించ‌లేదు. ఆ ఆలోచ‌న కూడా రాలేదు. త‌న హిట్ సినిమాల్ని రామ్ చ‌ర‌ణ్ చేస్తే చూడాల‌న్న‌ది త‌న ఆశ‌. అంతే త‌ప్ప‌... ఆ సీక్వెల్ లో తాను న‌టించాల‌ని ఎప్పుడూ అనుకోలేదు. అయితే.. ఆ ఛాన్స్ ఇప్పుడు చిరంజీవి ఎదురుగ్గా ఉంది. `జ‌గ‌దేక వీరుడు - అతి లోక సుంద‌రి` రూపంలో. చిరు సూప‌ర్ హిట్ చిత్రాల్లో అదొక‌టి. ఆసినిమాని ఎప్ప‌టి నుంచో రీమేక్ చేయాల‌న్న‌ది చిరు ఆశ‌. అశ్వ‌నీద‌త్ కూడా ఇదే విష‌యాన్ని చాలా సంద‌ర్భాల్లో చెప్పారు. రామ్ చ‌ర‌ణ్ - జాన్వీ క‌పూర్‌ల‌తో ఈ సినిమా చేస్తే బాగుంటుంద‌న్న‌ది ఆలోచ‌న‌. కానీ ఇంత వ‌ర‌కూ కార్య రూపం దాల్చ‌లేదు.

అయితే ఈ సీక్వెల్ పై ఇప్పుడు అనిల్ రావిపూడి గురి పెట్టారు. అనిల్ రావిపూడికి ఇష్ట‌మైన సినిమాల్లో `జ‌గ‌దేక వీరుడు - అతిలోక సుంద‌రి` ఒక‌టి. ఈ సినిమాకి సీక్వెల్ చేయాల‌న్న‌ది రావిపూడి ఆలోచ‌న‌. ఆ సీక్వెల్ చిరంజీవితోనే చేస్తే బాగుంటుంద‌ని అనుకుంటున్నార్ట‌.చిరుతో సినిమా చేయాల‌న్న‌ది అనిల్ రావిపూడి డ్రీమ్ ప్రాజెక్ట్. అది జ‌గ‌దేక వీరుడు సీక్వెల్ తో జ‌రిగితే అంత‌కంటే కావ‌ల్సిందేముంది? చిరుతో సినిమా చేయ‌డానికి యువ ద‌ర్శ‌కుల‌కు ఇదే స‌రైన స‌మ‌యం. ఎందుకంటే... యంగ్ స్ట‌ర్స్‌కి ఆయ‌న ఇప్పుడు విరివిగా ఆల‌వ‌కాశాలు ఇస్తున్నారు. సో... అనిల్ రావిపూడి డ్రీమ్ ప్రాజెక్టుకు ఇప్పుడు ఓ బాట ప‌డిపోయిన‌ట్టే.