'జయ జానకి నాయక' ఫస్ట్‌ లుక్‌తోనే దర్శకుడు బోయపాటి శ్రీను అందరినీ ఆశ్చర్యపరిచాడు. అయితే సెకెండ్‌ లుక్‌తో మాస్‌ ఆడియన్స్‌ని మెప్పించేందుకు ప్రయత్నించాడు. టైటిల్‌ సాఫ్ట్‌, దాంతోపాటుగానే ఫస్ట్‌ లుక్‌ ఇంకా క్లాస్‌ కావడంతో తొలిసారి బోయపాటి తన మాస్‌ జోనర్‌ నుంచి బయటకొచ్చాడేమోనని అనుకున్నవారు, రెండో లుక్‌ మాస్‌గా ఉండటంతో కుదురుకున్నారు. కానీ టీజర్‌తో మళ్ళీ స్వీట్‌ షాక్‌ ఇచ్చాడు బోయపాటి శ్రీను. 'జయ జానకి నాయక' టీజర్‌ అంతా చాలా కూల్‌గా ఉంది. అద్భుతమైన బ్యాక్‌గ్రౌండ్‌తో మంచి లవ్‌ ఫీల్‌ ఉండేలా టీజర్‌ని రూపొందించి విడుదల చేశారు. దేవిశ్రీప్రసాద్‌ సంగీతం, బ్యాక్‌గ్రౌండ్‌ స్కోర్‌ బాగా కుదిరాయి. కాఫీ కప్‌లో లవ్‌ సింబల్స్‌, హీరో హీరోయిన్ల ఫీల్‌ గుడ్‌ లుక్‌ ఇవన్నీ 'జయ జానకి నాయక' సినిమా టీజర్‌కి సూపర్బ్‌ క్లాస్‌ ఫ్లేవర్‌ని అద్దాయి. అన్నిటికీ మించి ఇందులో పండగలాంటి వాతావరణాన్ని చూపించారు. ఓ సెలబ్రేషన్‌ సన్నివేశాన్ని టీజర్‌లో పొందుపర్చడం ద్వారా ఇది ఆద్యంతం క్లాస్‌ టచ్‌తో ఉన్న మూవీ అనే సంకేతాల్ని పంపింది. ఇంతవరకు బోయపాటి శ్రీను చేసినవన్నీ మాస్‌ సినిమాలే. వాటికి భిన్నంగా ఈ సినిమాకి క్లాస్‌ టచ్‌ ఇచ్చాడు బోయపాటి. బెల్లంకొండ శ్రీనివాస్‌ హీరోగా నటిస్తున్న ఈ సినిమాలో రకుల్‌ ప్రీత్‌ సింగ్‌ హీరోయిన్‌. హీరో హీరోయిన్లు ఇద్దరూ న్యూ లుక్‌తో కనిపిస్తున్నారు.