జేడీ చక్రవర్తి అంటే 'గులాబీ' సినిమాలోని బీభత్సమైన ప్రేమికుడు గుర్తుకొస్తాడు. అలాగే 'జోష్‌' సినిమాలోని విలన్‌ పాత్ర మదిలో మెదులుతుంది. విలక్షణ పాత్రలు ఎంచుకుంటూ తనదైన ప్రత్యేకతను చాటుకునే జేడీ చక్రవర్తి తాజా చిత్రం 'ఉగ్రం'. ఈ సినిమా పోస్టర్‌ని లేటెస్ట్‌గా విడుదల చేశారు. ప్రముఖ కొరియోగ్రాఫర్‌ అమ్మ రాజశేఖర్‌ ఈ చిత్రానికి దర్శకత్వం వహిస్తున్నారు. అమ్మ రాజశేఖర్‌ దర్శకత్వంలో గోపీచంద్‌ హీరోగా గతంలో 'రణం' అనే సినిమా వచ్చింది. ఆ సినిమా మంచి విజయాన్ని అందుకుంది. 'ఉగ్రం' సినిమా డిఫరెంట్‌ బ్యాక్‌డ్రాప్‌లో తెరకెక్కిన యాక్షన్‌ మూవీ అని చిత్ర దర్శక నిర్మాతలు తెలిపారు. జేడీ చక్రవర్తి సరసన ఈ సినిమాలో అక్షిత హీరోయిన్‌గా నటిస్తోంది. ఈ మధ్య పెద్ద సినిమాలకు ప్రీ రిలీజ్‌ ఫంక్షన్లు నిర్వహించడం ఆనవాయితీగా వస్తోంది. చిన్న సినిమాలు కూడా ఈ ట్రెండ్‌ని ఫాలో అవుతున్నాయి. అదే ట్రెండ్‌ని ఫాలో అవుతూ 'ఉగ్రం' సినిమా ప్రీ రిలీజ్‌ ఈవెంట్‌ని మే మొదటి వారంలో నిర్వహించనున్నారట. కెరీర్‌లో ఎన్నో విలక్షణమైన చిత్రాల్ని చేసిన తనకు ఇది మరో మంచి సినిమా అవుతుందని అన్నాడు జెడి చక్రవర్తి. 'ఉగ్రం' ప్రేక్షకుల మెప్పు పొందుతుందని, అన్ని వర్గాల ప్రేక్షకుల్ని అలరించే మంచి కథాంశం ఈ చిత్రంలో ఉందని దర్శకుడు అమ్మ రాజశేఖర్‌ అంటున్నారు. ఈ చిత్రంలో జెడి చక్రవర్తి నట విశ్వరూపం చూడబోతున్నామట.