'జై లవకుశ' టీజర్‌ సినిమాపై భారీగా అంచనాలు పెంచేసింది. ఎన్టీఆర్‌ మూడు గెటప్స్‌నీ మూడు టీజర్స్‌గా విడుదల చేసి, సినిమాపై హైప్‌ క్రియేట్‌ చేశారు. అయితే ట్రైలర్‌ వచ్చాక అంచనాల్లో కొన్ని తారుమారయ్యాయని టాక్‌ వినిపిస్తోంది. గతంలో చిరంజీవి హీరోగా తెరకెక్కిన 'ముగ్గురు మొనగాళ్లు' సినిమాని పోలి ఉందనీ, అలాగే చిరంజీవి హీరోగా వచ్చిన 'రౌడీ అల్లుడు' సినిమాలతో పోలికలు ఎక్కువగా ఉన్నాయనీ అంటున్నారు. గతంలోనూ ఎన్టీఆర్‌ 'ఆంధ్రావాలా' సినిమాలో చిరంజీవి 'అత్తకి యముడు అమ్మాయికి మొగుడు' సినిమాలోని సీన్స్‌ని ఎత్తేశారు అని వాదనలొచ్చాయి. అయితే సీన్‌కి అనుగుణంగా కొన్ని పాత్రలు ఒకేలా ఉండొచ్చు కానీ అలా ఫలానా సినిమాలో సీన్‌ ఎత్తేశారు అనే మాట ఇబ్బందికరంగా ఉంటుంది. అయితే ఈ టాక్‌ మాత్రం బీభత్సంగా స్ప్రెడ్‌ అయిపోతోంది బయట. ప్రస్తుతం 'జై లవకుశ' సినిమాలో కూడా అలాంటి సీన్స్‌ చాలానే ఉండి ఉంటాయి అంటూ ప్రచారం బాగా జరుగుతోంది. ట్రైలర్‌ నుండే ఇన్ని అనుమానాలొచ్చేశాయి. ఇక సినిమా విడదలయ్యాక ఈ పోలికలు ఇంకెన్ని బయటికి వస్తాయో. బాబీపై ఎన్టీఆర్‌ పెట్టుకున్న నమ్మకం వమ్ము కాకుండా ఉంటుందా? ట్రిపుల్‌ రోల్‌ కాబట్టి అంతా ఈ సినిమాని చిరంజీవి 'ముగ్గురు మొనగాళ్లు'తో పోల్చుకోవడం సహజమే. అయితే అదే సినిమాలా ఈ సినిమా ఉండబోతోందనుకోవడం మాత్రం కరెక్ట్‌ కాదు. ఏది ఏమైనా ఎన్టీఆర్‌ ఎంతో ఇష్టపడి, కష్టపడి చేస్తున్న సినిమా 'జై లవకుశ'. ఈ నెల 21న ప్రేక్షకుల ముందుకు రానుంది.