అప్పుడెప్పుడో కాజల్‌, కళ్యాణ్‌రామ్‌ జంటగా తెరకెక్కిన చిత్రం గుర్తుంది కదా.. 'లక్ష్మీ కళ్యాణం'. ఆ సినిమాతోనే చందమామ కాజల్‌ తెలుగు తెరకు ఎంట్రీ ఇచ్చింది. మళ్లీ ఇన్నాళ్ల తర్వాత ఈ జంట ఆన్‌ స్క్రీన్‌ రొమాన్స్‌కి సిద్ధమవుతోందంటున్నాయి ఫిల్మ్‌ నగర్‌ వర్గాలు. కళ్యాన్‌రామ్‌ హీరోగా తెరకెక్కుతోన్న తాజా చిత్రం 'ఎమ్మెల్యే'. ఉపేంద్ర మాధవ్‌ అనే యంగ్‌ డైరెక్టర్‌ ఈ సినిమాని తెరకెక్కిస్తున్నారు. రాజకీయ నేపధ్యంలో ఈ సినిమా తెరకెక్కుతున్నట్లు తెలుస్తోంది. ఇప్పుడు చేయబోతున్న సినిమాలో కళ్యాణ్‌ రామ్‌ గెటప్‌ కొత్తగా ఉండబోతోందంటున్నారు. అయితే సినిమా టైటిల్‌ చూస్తే 'ఎమ్మెల్యే'. ఈ పేరు పాలిటిక్స్‌ పరంగా పెట్టారా? లేక 'సరైనోడు' సినిమాలో అల్లు అర్జున్‌ ఎమ్మెల్యేకి మై లవ్‌లీ ఏంజిల్‌ అంటూ కొత్తర్ధం చెప్పినట్లుగా ఈ సినిమా టైటిల్‌కి కూడా ఏమైనా కొత్తర్ధం ఉందా అనేది తెలీదు కానీ, కాన్సెప్ట్‌ అయితే కొత్తగా ఉంటుందట. ఈ సినిమాలో సీనియర్‌ నటిని హీరోయిన్‌గా తీసుకోవాలని చిత్ర యూనిట్‌ యోచిస్తోంది. అయితే ఆ సీనియర్‌ నటి కాజల్‌ అని ప్రచారం జరుగుతోంది. లాంగ్‌ గ్యాప్‌ తర్వాత కాజల్‌, కళ్యాన్‌రామ్‌ పెయిర్‌ రిపీట్‌ కాబోతుందన్న మాట. ప్రస్తుతం కాజల్‌ రానాతో 'నేనే రాజు నేనే మంత్రి' సినిమాలో నటిస్తోంది. మరో పక్క కళ్యాణ్‌ రామ్‌, ఎన్టీఆర్‌తో 'జై లవ కుశ' సినిమాని నిర్మిస్తున్నారు. తొలి సారిగా ఎన్టీఆర్‌ - కళ్యాణ్‌ రామ్‌ కాంబినేషన్‌లో వస్తోన్న సినిమా ఇది. అంతేకాదు భారీ బడ్జెట్‌తో ఎంతో ప్రతిష్ఠాత్మకంగా తెరకెక్కుతోన్న చిత్రం కూడా. బాబీ దర్శకత్వంలో తెరకెక్కుతోంది ఈ చిత్రం.
