ఈ ఏడాది టాలీవుడ్‌కి వీక్‌ ఇయర్‌ అని చెప్పాలి. గతేడాది వరుస హిట్స్‌తో, బాక్సాఫీస్‌ కళకళలాడింది. కానీ ఈ ఏడాది సరైన హిట్‌ ఒక్కటీ లేక విలవిలలాడిపోతోంది. బిగ్‌ సినిమాల్లో చాలా వరకూ దారుణంగా బెడిసికొట్టేశాయి. వాటిలో అనుష్క హీరోయిన్‌గా వచ్చిన 'భాగమతి' ఫర్వాలేదనిపించింది. చిన్న సినిమాలైన 'ఛలో' తదితర సినిమాలు ఓకే అనిపించాయి. కానీ ఓవరాల్‌గా తెలుగు సినిమా పరిస్థితి ఏం బాగోలేదు ఈ ఏడాది. దానికి తోడు వారం రోజుల ధియేటర్స్‌ బంద్‌ ఒకటి పెద్ద దెబ్బ తీసింది. దాంతో ఇప్పుడు సినిమాలు క్యూ కడుతున్నాయి.
చిన్న సినిమాల జాతర మొదలైందిప్పుడు. అందులో మొదటగా వస్తున్నవాడు యంగ్‌ హీరో నిఖిల్‌. ఈ నెల 16న 'కిర్రాక్‌ పార్టీ' సినిమాతో ప్రేక్షకుల ముందుకు వస్తున్నాడు నిఖిల్‌. కన్నడలో ఘన విజయం సాధించిన 'కిరిక్‌ పార్టీ' సినిమాకి ఇది తెలుగు రీమేక్‌గా తెరకెక్కింది. కాలేజీ చదువులు, స్నేహాలు, లవ్‌స్టోరీల నేపథ్యంలో ఈ సినిమా తెరకెక్కుతోంది. ప్రచార చిత్రాలు ఇప్పటికే సినిమాపై అంచనాలు పెంచేస్తున్నాయి. రెండు డిఫరెంట్‌ గెటప్స్‌లో నిఖిల్‌ కనిపించబోతున్నాడు
ఈ సినిమాలో. కాలేజీ కుర్రోడి పాత్రలో నిఖిల్‌ నటన ఆకట్టుకునేలా ఉండబోతోందట. నిఖిల్‌ అంటే ఎనర్జీకి పెట్టింది పేరు. అదే ఎనర్జీతో ఈ సినిమాతో మనోడు హిట్‌ కొట్టడం ఖాయమనిపిస్తోంది. హిట్‌ కళ అయితే కనిపిస్తోంది కానీ, చూడాలి మరి కుర్రోడు జోరు బాక్సాఫీస్‌కి హిట్‌ తెచ్చిపెడుతుందో లేదో! ముద్దుగుమ్మ సంయుక్తా హెగ్దే ఈ సినిమాలో నిఖిల్‌తో జోడీ కడుతోంది.
