కృష్ణవంశీ సినిమాలు నిర్మాణంలో ఒకింత ఆలస్యమవడం మామూలే. క్వాలిటీ కోసం తపించే క్రియేటివ్‌ డైరెక్టర్స్‌లో కృష్ణవంశీ కూడా ఒకరు. అందుకే, ఆయన సినిమాల నిర్మాణం అనుకున్న సమయానికి కాస్త అటూ ఇటూ అవడం జరుగుతుంటుంది. ఈలోగా సినిమా ఆగిపోయిందనే గాసిప్స్‌ వినవస్తుండడం కూడా సర్వసాధారణమే. అయితే అన్ని గాసిప్స్‌నీ పటాపంచలు చేస్తూ సినిమా మే నెలలో ప్రేక్షకుల ముందుకొచ్చేందుకు రెడీ అవుతోందట. ఒక్క పాట షూటింగ్‌ మాత్రమే బ్యాలెన్స్‌ ఉందని సినిమా యూనిట్‌ అధికారికంగా ప్రకటించింది. అది కూడా పూర్తి చేసేసి, సినిమాని మే నెలలో విడుదల చేస్తారు. ఈ సినిమాలో స్టార్‌ కాస్టింగ్‌ చాలా గట్టిగానే ఉంది. సందీప్‌ కిషన్‌, రెజినా, సాయిధరమ్‌తేజ్‌, ప్రగ్యా జైస్వాల్‌ తదితరులు ముఖ్యపాత్రల్లో నటిస్తున్నారు. తనది గెస్ట్‌ రోల్‌ అని సాయిధరమ్‌ చెబుతున్నప్పటికీ సినిమాలో ఆ పాత్ర అత్యంత కీలకమట. ఓ పవర్‌ ఫుల్‌ పోలీసాఫీసర్‌ పాత్రలో కనిపిస్తున్నాడు సాయి ధరమ్‌ తేజ్‌. అలాగే హీరోగా సందీప్‌ కిషన్‌ పాత్ర కూడా చాలా డిఫరెంట్‌గా ఉండబోతోందట. రెజీనాని ఇంతవరకూ ఇలాంటి పాత్రలో చూడలేదనిపిస్తోంది. విడుదలైన ఫస్ట్‌లుక్‌ పోస్టర్స్‌ చూస్తుంటే ఈ విషయం తెలుస్తోంది. 'నక్షత్రం' అనే బ్రైట్‌ టైటిల్‌ని ఈ సినిమాకి ఎంచుకున్నారు కృష్ణవంశీ. ఆ టైటిల్‌లో ఏం మ్యాజిక్‌ ఉందో సినిమాలో ఏం జిమ్మిక్కు ఉందో తెలియాలంటే చాలా కొద్ది కాలం మాత్రమే ఆగాలి. వెయిట్‌ అండ్‌ సీ.