'సాహసం శ్వాసగా సాగిపో' చిత్రంతో తెలుగు ప్రేక్షకులకు హాయ్‌ చెప్పిన బ్యూటీ మంజిమా మోహన్‌. అక్కినేని బుల్లోడు నాగచైతన్య హీరోగా తెరకెక్కిన ఈ చిత్రం ఓ మోస్తరు విజయాల ఖాతాలోకి వెళ్లినట్లే. కానీ కథ పరంగా విలక్షణ చిత్రంగా అందర్నీ ఆకట్టుకుంది. హీరోయిన్‌గా నటించిన మంజిమా మోహన్‌ తొలిచూపులోనే కుర్రకారు హృదయాల్ని కొల్లగొట్టేసింది. క్యూట్‌గా కనిపిస్తూనే మెచ్యూర్డ్‌ పర్‌ఫామెన్స్‌తో ఆకర్షించింది. అయితే ఆ సినిమా తర్వాత మరెక్కడా కనిపించలేదీ బ్యూటీ. యాక్టింగ్‌ టాలెంట్‌లో మంచి ప్రావీణ్యం చూపించినా ఎందుకో మంజిమా మోహన్‌కి మరో అవకాశం రాలేదు.
ప్రస్తుతం తమిళ, మలయాళ భాషల్లో సినిమాలు చేస్తున్న ఈ బ్యూటీ 'క్వీన్‌' మలయాళ రీమేక్‌లో నటిస్తోన్న సంగతి తెలిసిందే. మరోవైపు తమిళ హీరో జీవాతో ఓ సినిమాకి గ్రీన్‌ సిగ్నల్‌ ఇచ్చింది. 'రంగం', స్నేహితుడు' తదితర సినిమాలతో జీవా తెలుగు ప్రేక్షకులకు సుపరిచితుడే. ఆయన తమిళ చిత్రాలు తెలుగులో అనువాదమవుతూ ఉంటాయి. ఇప్పుడు జీవా, మంజిమా మోహన్‌ జంటగా తెరకెక్కుతోన్న ఈ తాజా చిత్రాన్ని కూడా తెలుగులో విడుదల చేయనున్నారనీ తెలుస్తోంది.
అరుళ్‌ నిధి ఈ సినిమాలో కీలక పాత్ర పోషిస్తున్నారు. ఫ్రెండ్‌షిప్‌ నేపథ్యంలో తెరకెక్కుతోన్న ఈ చిత్రాన్ని జీవా సోదరుడు జితిన్‌ రమేష్‌ నిర్మిస్తున్నారు. యువన్‌ శంకర్‌ రాజా మ్యూజిక్‌ అందిస్తున్నారు. ఈ నెల 13న ఈ ప్రాజెక్ట్‌ ప్రారంభం కానుంది. ఇదిలా ఉంటే, తెలుగు సినిమాల్లో మంచి అవకాశాలొస్తే మళ్లీ నటించేందుకు సిద్ధంగా ఉన్నానని చెబుతోందీ క్యూట్‌ బ్యూటీ. కథ నచ్చితే ఇంపార్టెంట్‌ రోల్స్‌లో కనిపించడానికైనా ఓకే అని ముద్దు ముద్దుగా చెప్పేస్తోంది అందాల మంజిమా మోహన్‌.
