తెలుగు చిత్ర‌సీమ‌కు సంబంధించిన అతి ముఖ్య‌మైన సీజ‌న్‌ల‌లో ద‌స‌రా ఒక‌టి. ఈ పండ‌క్కి... మూకుమ్మ‌డిగా సినిమాలొస్తుంటాయి. 2022 ద‌స‌రాకి కూడా భారీ స్థాయిలో సినిమాలు క్యూ క‌ట్ట‌డానికి సిద్ధ‌మ‌వుతున్నాయి. చిరంజీవి క‌థానాయ‌కుడిగా న‌టించిన చిత్రం `గాడ్ ఫాద‌ర్‌`. న‌య‌న‌తార క‌థానాయిక‌గా న‌టించారు. స‌ల్మాన్ ఖాన్ ఓ కీల‌క‌మైన పాత్ర పోషిస్తున్న సంగ‌తి తెలిసిందే. ఈ సినిమాకి సంంధించిన ఫ‌స్ట్ లుక్‌... సోమ‌వారం విడుద‌లైంది. ఈ సందర్భంగా రిలీజ్‌డేట్ కూడా ప్ర‌క‌టించారు. ద‌స‌రాకి ఈ చిత్రాన్ని విడుద‌ల చేస్తున్నామ‌ని చిత్ర‌బృందం స్ప‌ష్టం చేసింది. అంటే చిరు ద‌స‌రా బ‌రిలో ఉన్న‌ట్టే.
మ‌రోవైపు బాల‌కృష్ణ కూడా ద‌స‌రాకి కాలు దువ్వుతున్నారు. బాల‌య్య - గోపీచంద్ మ‌లినేని కాంబినేష‌న్‌లో ఓ చిత్రం రూపుదిద్దుకుంటోంది. ఈ సినిమాకింకా టైటిల్ ఖ‌రారు కాలేదు. ఫుల్ లెంగ్త్ యాక్ష‌న్ డ్రామాగా ఈ చిత్రం రూపుదిద్దుకుంటోంది. శ్రుతిహాస‌న్ క‌థానాయిక‌గా న‌టిస్తున్న ఈ చిత్రాన్ని ద‌స‌రాకి విడుద‌ల చేయాల‌ని చూస్తున్నారు. ఒక‌వేళ బాల‌య్య సినిమా ద‌స‌రాకి వ‌స్తే... చిరు - బాల‌య్య మాధ్య ఆస‌క్తిక‌ర‌మైన పోటీ చూసే అవ‌కాశం ఉంది. ర‌వితేజ క‌థానాయ‌కుడిగా న‌టిస్తున్న `రావ‌ణాసుర` కూడా ద‌స‌రాకే రావాల‌ట. స‌మంత ప్ర‌ధాన పాత్ర పోషించిన `య‌శోద`ని ఆగ‌స్టులో విడుద‌ల చేయాల‌నుకొన్నారు.
కానీ ఈసినిమా అనుకోని ప‌రిస్థితుల వ‌ల్ల వాయిదా ప‌డింది. ఈ చిత్రాన్నీ ద‌స‌రాకే షిఫ్ట్ చేశార‌ని తెలుస్తోంది. ఈ నాలుగు సినిమాలూ పండ‌క్కి వ‌స్తే.. బాక్సాఫీసు క‌ళ‌క‌ళ‌లాడిపోయిన‌ట్టే.
