కన్నడలో పెద్ద హిట్‌ అయిన 'కిరిక్‌ పార్టీ' సినిమాని తెలుగులో రీమేక్‌ చేస్తున్న సంగతి తెలిసిందే. ఈ సినిమాలో యంగ్‌ హీరో నిఖిల్‌ హీరోగా నటిస్తున్నాడు. ఈ సినిమాకి 'కిర్రాక్‌ పార్టీ' అనే టైటిల్‌ని ఖరారు చేశారు. శరణ్‌ కొప్పిశెట్టి దర్శకత్వంలో ఈ సినిమా తెరకెక్కుతోంది.సుంకర రామబ్రహ్మం నిర్మిస్తున్నారు. కాగా ఈ సినిమాకి ఎన్నో ప్రత్యేకతలున్నాయి. 

ఏకంగా ముగ్గురు డైరెక్టర్స్‌ సంయుక్తంగా ఈ సినిమాకి పని చేయడం విశేషం. డైరెక్టర్‌ శరణ్‌ కొప్పిశెట్టితో సహా 'ప్రేమమ్‌' డైరెక్టర్‌ చందూ మొండేటి ఈ సినిమాకి డైలాగ్స్‌ అందిస్తున్నారు. ఈయన ప్రస్తుతం నాగ చైతన్యతో 'సవ్యసాచి' సినిమాని తెరకెక్కిస్తున్నారు. మరో యంగ్‌ డైరెక్టర్‌ సుధీర్‌ వర్మ ఈ సినిమాకి స్క్రీన్‌ప్లే అందిస్తున్నారు. ప్రస్తుతం శర్వానంద్‌తో సినిమా చేస్తున్నాడు సుధీర్‌ వర్మ. ఒరిజినల్‌లో హీరోయిన్‌గా నటించిన రష్మికా మండన్నాకి ఈ సినిమా మంచి పేరు తీసుకొచ్చి పెట్టింది. చేసింది కన్నడ సినిమా అయినా కానీ టాలీవుడ్‌లో కూడా ఆమె పేరు మార్మోగిపోయింది ఆ సినిమా తర్వాత. 

యాక్టింగ్‌ పరంగా 'కిరిక్‌ పార్టీ' ఈ ముద్దుగుమ్మకి మంచి గుర్తింపు తెచ్చిపెట్టింది. తాజాగా ఈ బ్యూటీ 'ఛలో' సినిమాతో తెలుగులోకి తెరంగేట్రం చేస్తోంది. యంగ్‌ హీరో నాగ శౌర్య హీరోగా నటిస్తున్నాడు ఈ సినిమాలో. అయితే 'కిర్రాక్‌ సినిమా కోసం కొత్త బ్యూటీ సంయుక్తా హెగ్దేని ఎంచుకున్నారు. ఇకపోతే నిఖిల్‌ విషయానికి వస్తే, ఈ మధ్య వరుస విజయాలతో దూసుకెళ్తున్నాడు నిఖిల్‌. 'ఎక్కడికి పోతావు చిన్నవాడా', 'కేశవ' తదితర చిత్రాలతో మంచి విజయాలు అందుకున్నాడు. తాజా చిత్రంపై కూడా అంచనాలు బాగానే ఉన్నాయి. త్వరలో ఈ చిత్రం ప్రేక్షకుల ముందుకు రానుంది.