టాలీవుడ్‌లో నెంబర్‌ వన్‌ హీరోయిన్‌గా పేరు తెచ్చుకున్న ముద్దుగుమ్మ రకుల్‌ ప్రీత్‌సింగ్‌ నటిస్తున్న తాజా చిత్రం 'అయ్యారీ'. బాలీవుడ్‌ సినిమా ఇది. ఇటీవలే ట్రైలర్‌ విడుదలైంది. ఇప్పటికే ఏడు మిలియన్‌ వ్యూస్‌ దాటేసింది ఈ ట్రైలర్‌. సిద్దార్ద్‌ మల్హోత్రా ఈ సినిమాలో రకుల్‌తో జత కడుతున్నాడు. అనుపమ్‌ ఖేర్‌, నసీరుద్దీన్‌ షా, మనోజ్‌ బాజ్‌పాయ్‌ వంటి హేమా హేమీలు ఈ సినిమాలో నటిస్తున్నారు.  

బిగ్‌బీ అమితాబ్‌ బచ్చన్‌ ఈ సినిమా ట్రైలర్‌ చూసి చాలా ఇంప్రెస్‌ అయ్యారట. టీమ్‌ని ప్రశంసలతో ముంచెత్తేశారట. బాలీవుడ్‌లో పలువురు ప్రముఖుల నుండి ప్రశంసలు అందుకుంటోందీ ట్రైలర్‌. నీరజ్‌ పాండే ఈ చిత్రాన్ని తెరకెక్కిస్తున్నారు. టాలీవుడ్‌, కోలీవుడ్‌ నుండి రకుల్‌కి ప్రశంసలు అందుతున్నాయి. ఇండియన్‌ ఆర్మీ నేపథ్యంలో తెరకెక్కుతోన్న సినిమా ఇది. ట్రైలర్‌కే ఇంతలా ప్రశంసలు దక్కుతుండడం చూసి ముద్దుగుమ్మ రకుల్‌ ప్రీత్‌ సింగ్‌ ఉబ్బితబ్బిబ్బవుతోంది. 

తెలుగులో ప్రస్తుతం రకుల్‌ జోరు కొద్దిగా తగ్గింది. కోలీవుడ్‌లో రకుల్‌ హవా మొదలైంది. కోలీవుడ్‌లో రకుల్‌ ప్రీత్‌సింగ్‌ రెండు సినిమాల్లో నటిస్తోంది. సూర్య, కార్తీ హీరోలుగా నటిస్తున్న చిత్రాల్లో రకుల్‌ హీరోయిన్‌గా నటిస్తోంది. అంటే ఒకేసార కోలీవుడ్‌ బ్రదర్స్‌ సూర్య, కార్తీలతో జత కడుతోందన్న మాట. ఇవి కాక మరిన్ని కొత్త ప్రాజెక్టులు చర్చల దశలో ఉన్నాయి. తెలుగులో రకుల్‌ ప్రీత్‌సింగ్‌ చేతిలో పెద్దగా సినిమాలు లేవు ఇప్పుడు కానీ, కొన్ని క్రేజీ ప్రాజెక్టులు రకుల్‌ పరిశీలనలో ఉన్నాయట. త్వరలోనే వాటి వివరాలు చెబుతానంటోందీ బ్యూటీ. ప్రస్తుతానికైతే, 'అయ్యారీ' ప్రమోషన్స్‌లో బిజీగా ఉంది. జనవరి 26న ఈ సినిమా ప్రేక్షకుల ముందుకు రానుంది.