ప్ర‌స్తుతం సుకుమార్ ద‌ర్శ‌క‌త్వంలో న‌టిస్తున్నాడు రామ్ చ‌ర‌ణ్‌. ఈనెల 20న ఈ చిత్రం షూటింగ్ ప్రారంభించుకోనుంది. సుక్కు త‌ర‌వాత చ‌ర‌ణ్ చేయ‌బోయే సినిమా ఏమిట‌న్న విష‌యంలో అప్పుడే ఓ స్ప‌ష్ట‌త వ‌చ్చేసింది. చ‌ర‌ణ్ త‌దుప‌రి సినిమా మ‌ణిర‌త్నంతో ఖాయ‌మైపోయింది. ఇప్పుడు షెడ్యూల్ కూడా బ‌య‌ట‌కు వ‌చ్చేసింది. జూన్ లో ఈ సినిమా ప‌ట్టాలెక్క‌డం ఖాయమ‌ని విశ్వ‌స‌నీయ వ‌ర్గాల స‌మాచారం. అన్న‌ట్టు... ఈ సినిమాలో రామ్ చ‌ర‌ణ్ ఓ రా ఏజెంట్‌గా క‌నిపించ‌నున్నాడ‌ట‌. ప్ర‌స్తుతం మ‌ణిర‌త్నం చెలియా ప‌నుల్లో బిజీగా ఉన్నారు. కార్తీ క‌థానాయ‌కుడిగా న‌టించిన ఈ చిత్రం ఏప్రిల్ తొలి వారంలో విడుద‌ల కానుంది. ఆ వెంట‌నే చ‌ర‌ణ్ సినిమా ప‌నుల్లో ప‌డిపోతారు మ‌ణిర‌త్నం. గీతాంజ‌లి త‌ర‌వాత మ‌ణిర‌త్నం నేరుగా తెలుగు సినిమాలేం చేయ‌లేదు. దాంతో ఈ సినిమాపై అప్పుడే అంచ‌నాలు మొద‌లైపోయాయి.