రామ్‌ చరణ్‌ - సుకుమార్‌ మాయాజాలం 'రంగస్థలం' సినిమాలోని మొదటి ఆడియో సింగిల్‌ 'ఎంత సక్కగున్నావే' పాటకి ఎంత ఆదరణ లభిస్తోందో ప్రత్యేకంగా చెప్పక్కర్లేదు. ఇప్పుడు మరో ఆడియో సింగిల్‌ రాబోతోంది. అదే టైటిల్‌ సాంగ్‌ 'రంగా రంగా రంగస్థలానా..' ఈ పాటను రేపు విడుదల చేయనున్నారు. ఈ సినిమాకి మ్యూజిక్‌ మాంత్రికుడు దేవిశ్రీ ప్రసాద్‌ సంగీతం అందిస్తున్న సంగతి తెలిసిందే. 

దేవిశ్రీ ప్రసాద్‌ కంపోజేషన్‌లో ఈ సాంగ్‌ ఎంత అందంగా తీర్చి దిద్దుకోనుందో తెలియ చెప్పేందుకు సరదాగా ఓ వీడియోని విడుదల చేశారు దేవి అండ్‌ టీమ్‌. ఇదో ఫోక్‌ సాంగ్‌. అందుకే ఈ సాంగ్‌కి వాడే మ్యూజిక్‌ పరికరాలన్నింటితోనూ దేవిశ్రీ ఈ వీడియోలో కనిపించి కనువిందు చేశాడు. జానపదానికి ప్రాణమైన సాధారణ డప్పులతో దేవి ఈ పాటను కంపోజ్‌ చేశాడు. ఇక ఈ పాటకు రామ్‌ చరణ్‌ వేస్తున్న చిందులు చూస్తే.. షాకవ్వాల్సిందేనట మరి. 

అందుకే జస్ట్‌ శాంపిల్‌గా ఓ స్టిల్‌ని వదిలారిప్పటికే. ఈ సాంగ్‌లో రామ్‌చరణ్‌ వీరంగం ఆడేస్తున్నట్లే ఉంది. రుద్ర తాండవంలా కనిపిస్తున్నాడు. ఆ గెటప్‌ గురించి ఎంత చెప్పుకున్నా తక్కువే అనిపిస్తోంది. ఈ పాటకి ఆ గెటప్‌లో రామ్‌ చరణ్‌ స్టిల్‌ వర్ణనాతీతం. జస్ట్‌ ఒక్క స్టిల్లే ఇలా ఉంటే, ఇక పాట మొత్తం ఇంకెంతలా ఉండబోతోందో కదా. 

మెగా అభిమానుల్లో ఇదే ఉత్కంఠ ఇప్పుడు. ఎప్పుడెప్పుడు ఈ సినిమా ప్రేక్షకుల ముందుకు వస్తుందోనని ఎదురు చూస్తున్నారు. రామలక్ష్మి పాత్రలో సమంత అచ్చ తెలుగు పల్లె పడుచులా అద్దినట్లు సరిపోయింది. చిట్టిబాబుగా రామ్‌చరణ్‌ గెటప్‌కి మాటల్లేవ్‌. మాట్లాడుకోవడాల్లేవ్‌. ఈ నెల 30న సినిమా ప్రేక్షకుల ముందుకు రానుంది.