శంకర్‌ దర్శకత్వంలో రూపొందిన చిత్రం 'రోబో' ఓ విజువల్‌ వండర్‌గా అభివర్ణిస్తారు. అలాంటిది ఈ 'రోబో' చిత్రాన్ని తాజాగా తెరకెక్కుతోన్న '2.0'కు టీజర్‌ అనేశారు మన ప్రియమైన దర్శకులు శంకర్‌ గారు. అంటే 'రోబో' చిత్రాన్ని మించిన స్థాయిలో '2.0' విజువల్స్‌ ఉండబోతున్నాయనీ ఆయన చెబుతున్నారు. ఈ సినిమా కోసం ఓ కొత్త టెక్నాలజీని యూజ్‌ చేశారట. ఆ టెక్నాలజీతో సృష్టించిన గ్రాఫిక్స్‌ నేచురాలిటీకి అత్యంత దగ్గరగా ఉంటాయట. ఆ టెక్నాలజీతోనే ఈ '2.0' సినిమా రూపొందుతోందన్న మాట. ఎప్పుడో గత సంవత్సరం దీపావళికి రిలీజ్‌ కావల్సిన ఈ సినిమా ఇప్పటికీ రిలీజ్‌ కాలేదు. ఇంకా ఎప్పుడు వస్తుందో కూడా తెలీదు.

ఈ తరుణంలో '2.0' అప్‌డేట్స్‌ ఏంటా? అని అభిమానులు వేయి కళ్లతో ఎదురు చూస్తున్న సమయంలో చిత్ర యూనిట్‌ మీడియా ముందుకొచ్చి కొన్ని ఆశక్తికరమైన విషయాలను మనతో పంచుకుంది. ఈ సినిమాని చూస్తున్నంత సేపూ హాలీవుడ్‌ సినిమాల్లో ఉండే థ్రిల్‌ని ఫీల్‌ అవుతామని శంకర్‌ చెబుతున్నారు. ఆ ఫీల్‌ కలిగించేందుకు చిత్ర యూనిట్‌ ఎంత కష్టపడిందో ప్రేక్షకులకు తెలియజేసేలా శాంపిల్‌కి ఓ మేకింగ్‌ వీడియోని కూడా రిలీజ్‌ చేశారు. అన్నట్లు ఈ సంగతి పక్కన పెడితే, 'రోబో'లో చిట్టి రోబో చాలా మంచిది కదా. విలన్‌ చేతుల్లోకి వెళ్లాకా పాపం చెడ్డదైపోతుంది. అయితే '2.0'లో ఆ చెడ్డ చిట్టి రోబోకి మించిన విలన్‌ రోబో ఉంటుందట.

మన డైరెక్టర్‌ శంకరే ఈ విషయాన్ని చెప్పారు. ఈ రకంగా ఈ సినిమాకి పబ్లిసిటీ షురే చేశారన్న సంగతి తెలుస్తోంది. అంటే త్వరలోనే ఈ సినిమాని ప్రేక్షకుల ముందుకు తీసుకురానున్నారన్న విషయం కూడా అర్ధమవుతోంది మరి. అద్భుతమైన విజువల్‌ వండర్‌గా తెరకెక్కుతోన్న ఈ సినిమాలో సూపర్‌స్టార్‌ రజనీకాంత్‌ ప్రధాన పాత్ర పోషిస్తుండగా, బాలీవుడ్‌ బ్యూటీ అమీజాక్సన్‌ హీరోయిన్‌గా నటిస్తోంది. బాలీవుడ్‌ స్టార్‌ హీరో అక్షయ్‌ కుమార్‌ విలన్‌గా నటిస్తున్నాడు.