RRR నుంచి ఈ రోజు... అనుకోని స‌ర్‌ప్రైజ్ వ‌చ్చింది. ఎన్టీఆర్‌, రామ్ చ‌ర‌ణ్‌లు క‌లిసి ఉన్న పోస్ట‌ర్ ని చిత్ర‌బృందం విడుద‌ల చేసింది. కొమ‌రం భీమ్, అల్లూరి సీతారామ‌రాజు... ఇద్ద‌రూ క‌లిసి బైక్ మీద ర‌య్‌.. ర‌య్‌మంటూ దూసుకుపోతున్న పోస్ట‌ర్ అది. అటు మెగా ఫ్యాన్స్ కీ, ఇటు ఎన్టీఆర్ ఫ్యాన్స్ కి ఫీస్ట్ లా అనిపిస్తోంది. ఈ పోస్ట‌ర్ లోనే.. రిలీజ్ డేట్ కూడా క‌నిపించింది. ముందే చెప్పిన‌ట్టు అక్టోబ‌రు 13న ఈ సినిమా విడుద‌ల కానుంది. అక్టోబ‌రు 13నే ఈ సినిమా వస్తుంద‌ని చిత్ర‌బృందం ముందు నుంచీ చెబుతూనే ఉంది. అయితే ఎవ‌రికీ న‌మ్మ‌కాల్లేవు. క‌రోనా ప‌రిస్థితులు, సినిమాల షూటింగ్ లు ఆగిపోవ‌డం... ఇవ‌న్నీ చూసి అక్టోబ‌రు 13న ఈ సినిమా రాదనుకున్నారంతా.

అయితే.. మ‌రోసారి పోస్టర్ పై అదే డేట్ క‌నిపించ‌డంతో.. చెప్పిన స‌మ‌యానికే రాజ‌మౌళి ఈ సినిమా తీసుకువ‌స్తాడ‌న్న విష‌యంలో ఓ క్లారిటీ వ‌చ్చింది. RRR సినిమా విడుద‌ల తేదీని బ‌ట్టే, మిగిలిన సినిమాల విడుద‌ల‌లు ఆధార‌ప‌డి ఉంటాయి. కాబ‌ట్టి.. మిగిలిన సినిమాల ప్లానింగ్ కూడా అక్టోబరు 13 చుట్టూనే తిరుగుతాయి. సో.. మిగిలిన సినిమాల‌కూ ఓ క్లారిటీ వ‌చ్చేసిన‌ట్టే. RRR షూటింగ్ దాదాపుగా పూర్త‌యింది. రెండు పాట‌లే బాకీ ఉన్నాయ‌ట‌. జులైలోనే ఈ రెండు పాట‌ల్నీ పూర్తి చేసే అవ‌కాశాలు పుష్క‌లంగా క‌నిపిస్తున్నాయి. ఆగ‌స్టు నుంచి ఈ సినిమా ప్ర‌చారం కూడా మొద‌లైపోతుంది.