ఈ యేడాది అక్టోబ‌రు 13న ఆర్‌.ఆర్‌.ఆర్ వ‌స్తుంద‌ని.. చిత్ర‌బృందం ఢంకా బ‌జాయించి మ‌రీ చెబుతూ వ‌స్తోంది. ప్ర‌తీ పోస్ట‌రుపైనా అదే డేటు. అయితే ఈ రిలీజ్ డేట్ ని ట్రేడ్ వ‌ర్గాలు, మీడియా ఏమాత్రం న‌మ్మ‌లేదు. అక్టోబ‌రు 13న ఈ సినిమా విడుద‌ల చేయ‌డం అసాధ్య‌మ‌ని తేల్చేశాయి. ఇప్పుడు అదే జ‌రుగుతోంది. అక్టోబ‌రు 13న ఈ సినిమా రావ‌డం లేదు. 2022 ఉగాదికి ఈ చిత్రాన్ని విడుద‌ల చేయ‌నున్నార‌న్న‌ది లేటెస్ట్ టాక్‌.

2022 సంక్రాంతికి ఆర్‌.ఆర్‌.ఆర్ ని తీసుకొస్తే ఎలా ఉంటుంద‌న్న విష‌యంలో చిత్ర‌బృందం త‌ర్జ‌న భ‌ర్జ‌న‌లు చేసింది. అయితే... ఇప్ప‌టికే 2022 సంక్రాంతి బెర్తుల‌న్నీ భ‌ర్తీ అయిపోయాయి. ఏకంగా 4 సినిమాలు రిలీజ్ డేట్ లు ప్ర‌క‌టించుకున్నాయి. ఇలాంట‌ప్పుడు సంక్రాంతి బ‌రిలో నిలుస్తున్నామంటే.. లేనిపోని గంద‌ర‌గోళాన్ని క్రియేట్ చేసేవాళ్ల‌మ‌వుతామ‌న్న ఉద్దేశ్యంతో సంక్రాంతి బ‌రి నుంచి ఆర్‌.ఆర్‌.ఆర్ త‌ప్పుకుంది. అయితే 2022 వేస‌వికి రావొచ్చు. కానీ.. ఉగాదికి విడుద‌ల చేస్తే... అన్ని ర‌కాలుగా క‌లిసి వ‌స్తుంద‌ని ఇప్పుడు ఈ కొత్త నిర్ణ‌యం తీసుకున్నార‌ని స‌మాచారం. త్వ‌ర‌లోనే చిత్ర‌బృందం ఓ మీడియా స‌మావేశం నిర్వ‌హించ‌బోతోంద‌ని, ఈ సంద‌ర్భంగా విడుద‌ల తేదీ ప్ర‌క‌టిస్తార‌ని తెలుస్తోంది.