స్టార్ హీరో సినిమా వ‌స్తోందంటే, దాని చుట్టూ అనేక రూమ‌ర్లు పుట్టడం స‌హ‌జ‌మే. తాజాగా `అయ్య‌ప్ప‌యుమ్ కోషియ‌మ్‌`రీమేక్‌పై కూడా చాలా ఊహాగానాలు, రూమ‌ర్లు చ‌లామ‌ణీ అవుతున్నాయి. ఈసినిమాలో ఇద్ద‌రు హీరోలు ఉండ‌ర‌ని, ఉన్నా.. రెండో పాత్ర ప‌రిధి చాలా మేర‌కు త‌గ్గించేస్తున్నార‌ని, దాదాపుగా ఇది సోలో హీరో సినిమానే అని టాలీవుడ్ లో ఓ రూమర్ చ‌క్క‌ర్లు కొడుతోంది.

ప‌వ‌న్ క‌ల్యాణ్ కాకుండా ఈ రీమేక్‌లో మ‌రో హీరో కూడా ఉన్నాడ‌న్న సంగ‌తి తెలిసిందే. ఆ పాత్ర రానాకు దాదాపుగా ఖ‌రారు అయ్యింది. అయితే... ప‌వ‌న్ ఇమేజ్ కోసం చేస్తున్న మార్పుల్లో భాగంగా, ప‌వ‌న్ పాత్ర‌ని మ‌రింత పెంచ‌డ‌మే ధ్యేయంగా.. స్క్రిప్టు వ‌ర్క్ జ‌రుగుతోంద‌ని, రెండో క‌థానాయ‌కుడి పాత్ర నిడివి త‌గ్గించి, ఆ స్థానంలో ప‌వ‌న్ పాత్ర ర‌న్ టైమ్ పెంచుతున్నార‌ని చెప్పుకున్నారు.

అయితే.. ఈ వార్త‌ల్లో నిజం లేద‌ని ద‌ర్శ‌కుడు స్వ‌యంగా క్లారిటీ ఇచ్చాడు. ఈ సినిమాలో ఇద్ద‌రు హీరోలు ఉంటార‌ని, ఇద్ద‌రివీ పోటా పోటీ పాత్ర‌లే అని, ప‌వ‌న్ కోసం మ‌రో పాత్ర‌ని త‌గ్గించ‌డం ఉండ‌ద‌ని ద‌ర్శ‌కుడు సాగ‌ర్ చంద్ర తేల్చి చెప్పేశారు. అయితే తాను స్వ‌త‌హాగా ప‌వ‌న్ అభిమాని అని, ప‌వ‌న్ పాత్ర అభిమానుల‌కు న‌చ్చేలానే తీర్చిదిద్దాన‌ని, ఆ మార్పులు ప‌వ‌న్‌కీ న‌చ్చాయ‌ని అంటున్నారు సాగ‌ర్‌. సో.. ఈ రీమేక్ పై వ‌స్తున్న వార్త‌లేవీ నిజం కావ‌న్న‌మాట‌.