మెగా మేనల్లుడు సాయి ధరమ్‌ తేజ్‌ డాన్సుల్లో దిట్ట అన్న సంగతి తెలిసిందే. మావయ్య చిరంజీవి స్టైల్‌, మేనరిజమ్స్‌ బాగా ఉన్నాయి మనోడికి. ఇంతవరకూ తాను చేసిన సినిమాల్లో మావయ్య సినిమాల్లోని సాంగ్స్‌ని రీ మిక్స్‌ చేసేసి, వాటికి ఫ్లోర్‌ అదిరిపోయే డాన్సులు చేసేసి మెగా ఫ్యాన్స్‌ని ఫ్రెష్‌ ఫ్రెష్‌గా ఖుషీ చేసేశాడు. ఈ సారి 'జవాన్‌' సినిమాతో ప్రేక్షకుల ముందుకు రానున్నాడు సాయి ధరమ్‌ తేజ్‌. 'జవాన్‌' సినిమా కోసం ఒక నిమిషానికి పైగా ఉండే డాన్స్‌ సీక్వెన్స్‌ అద్భుతంగా చేశాడట సాయిధరమ్‌ తేజ్‌. అయితే తొలి నాళ్లలో సూపర్బ్‌ డాన్సర్‌ అని ప్రశంసలు అందుకున్న మన మెగా మేనల్లుడు ఈ మధ్య డాన్సింగ్‌ స్కిల్స్‌ని అంతగా ఎలివేట్‌ చేయడంలేదు. 'తిక్క', 'విన్నర్‌' సినిమాలు కొంత నిరాశను మిగిల్చాయి తేజుకి. దాంతో 'జవాన్‌' విషయంలో చాలా జాగ్రత్తలు తీసుకుంటున్నాడట. రచయిత బివిఎస్‌ రవి ఈ చిత్రానికి దర్శత్వం వహిస్తున్నాడు. 'కృష్ణగాడి వీర ప్రేమగాధ' ఫేం మెహరీన్‌ కౌర్‌ ఈ సినిమాలో సాయిధరమ్‌ తేజ సరసన హీరోయిన్‌గా నటిస్తోంది. కూల్‌ అండ్‌ లవ్‌లీ ఫ్యామిలీ ఎంటర్‌టైనర్‌గా ఈ సినిమా తెరకెక్కుతోంది. ఇకపోతే డాన్సుల్లో మేనమామ చిరంజీవికి తగ్గవాడేనని ఇప్పటిదాకా గుర్తింపు పొందిన మెగా మేనల్లుడు, 'జవాన్‌'తో డాన్సుల్లో మావయ్యని మించిన మేనల్లుడు అనిపించుకోవడం ఖాయమంటున్నారు.