కీర్తి సురేష్‌ లీడ్‌ రోల్‌లో అలనాటి మేటి నటి సావిత్రి జీవిత ఆధారంగా సినిమా తెరకెక్కుతోన్న సంగతి తెలిసిందే. 'మహానటి' టైటిల్‌తో తెరకెక్కుతోన్న ఈ సినిమాని నాగ్‌ అశ్విన్‌ తెరకెక్కిస్తున్నారు. స్వప్నా దత్‌ నిర్మాణంలో ఈ సినిమా రూపొందుతోంది. అయితే 'మహానటి'కి సంబంధించి ఓ షాకింగ్‌ న్యూస్‌ ఇప్పుడు బయటికి వచ్చింది. ఈ సినిమాలో సమంత కీలక పాత్ర పోషిస్తున్న సంగతి తెలిసిందే. 

అయితే ముందుగా లీడ్‌ రోల్‌ కోసం సమంతనే అనుకున్నారట. సావిత్రి పాత్రలో నటించడం అంటే చిన్న విషయం కాదు. ఆమె కొన్ని సెకన్లలోనే కొన్ని వందల హావభావాలను పలికించగల సత్తా ఉన్న నటి. అలాంటి ఆమె పాత్రను పోషించడం అంటే అంత తేలికేం కాదు. అందుకు నటనలో ఎంతో అనుభవం ఉండాలి. అందుకే చాలా సినిమాల్లో నటించిన అనుభవం ఉన్న సమంతనే ఈ పాత్రకి ఎంచుకుందామనుకున్నారట. అయితే ఈ పాత్ర కోసం ఓ ఫ్రెష్‌ అమ్మాయిని ఎంచుకోవాలని డైరెక్టర్‌ అనుకున్నారట. ఆ కారణంగా కీర్తి సురేష్‌ అయితే బావుంటుందని భావించి, ఆమెను ఎంపిక చేసుకున్నారట. 

కీర్తి ఈ సినిమాకి సైన్‌ చేసేటప్పటికి ఇండస్ట్రీకి చాలా కొత్త అని అంటున్నారు. ఇంతకీ ఈ విషయాలన్నీ చెప్పింది ఎవరనే కదా. ఈ సినిమా నిర్మాత స్వప్నా దత్‌ ఓ ఇంటర్య్వూలో ఈ షాకింగ్‌ విషయాలను బయట పెట్టారు. అయితే నటిగా ఇప్పటికే స్టార్‌డమ్‌ సంపాదించిన సమంతని కాదనీ, కొత్త బ్యూటీ కీర్తి సురేష్‌ని ఎంచుకోవడం అనేది కొంచెం రిస్కీ విషయమే. అయితే కీర్తి సురేష్‌ని తక్కువగా అంచనా వేసేందుకు లేదు. మహానటి సావిత్రి పాత్రకు కీర్తి ఎంపిక సరైనదే. ఆమె ముఖంలో సావిత్రి కళ కొట్టిచ్చినట్లు కనిపిస్తుంది. తక్కువ సినిమాల అనుభవమే ఉన్న కీర్తి సురేష్‌ ఈ సినిమాతో నటిగా తానేంటో ప్రూవ్‌ చేసుకోవాల్సి ఉంది. 

ఈ సినిమాలో కీర్తి సురేష్‌, సమంతలతో పాటు దుల్కర్‌ సల్మాన్‌, విజయ్‌ దేవరకొండ, షాలినీ పాండే, ప్రకాష్‌ రాజ్‌, మోహన్‌బాబు తదితరులు ఇతర ముఖ్య పాత్రలు పోషిస్తున్నారు.