సెకండ్ వేవ్ త‌ర‌వాత థియేట‌ర్లు తెరచుకున్నాయి. మెల్ల‌గా కొత్త సినిమాల తాకిడి ప్రారంభ‌మైంది. గ‌త వారంలో ఏకంగా 7 సినిమాలొచ్చాయి. ఈవారం మ‌రో అర‌డ‌జ‌ను చిత్రాలు విడుద‌ల‌కు రెడీ అయ్యాయి. మ‌రోవైపు... కొన్ని సినిమాలు ఓటీటీ బాట ప‌డుతున్నాయి. `ట‌క్ జ‌గ‌దీష్‌` అమేజాన్ ప్రైమ్ లోకి వెళ్లిపోయింద‌ని ప్ర‌చారం ప్రారంభ‌మైంది. ఈ డీల్ కి చిత్ర‌బృందం ఓకే అంది. త్వ‌ర‌లోనే రిలీజ్ డేట్ రాబోతోంది. ఇప్పుడు మ‌రో సినిమా కూడా అమేజాన్ సొంతం చేసుకుంద‌ని స‌మాచారం అందుతోంది. అదే.. సిటీమార్‌.
గోపీచంద్ - త‌మ‌న్నా జంట‌గా న‌టించిన చిత్ర‌మిది. సంప‌త్ నంది ద‌ర్శ‌కుడు. ఎప్పుడో సిద్ధ‌మైంది. అయితే... రిలీజ్ వాయిదా ప‌డుతూ వ‌స్తోంది. ప‌రిస్థితుల‌న్నీ అనుకూలించిన త‌ర‌వాత థియేట‌ర్లో విడుద‌ల చేయాల‌ని నిర్మాత‌లు భావించారు. ఈలోగా.. అమేజాన్ నుంచి అదిరిపోయే ఓటీటీ ఆఫర్ వ‌చ్చింద‌ని స‌మాచారం. ఈ ఆఫర్ తో నిర్మాత‌లు ఏకంగా 5 కోట్ల వ‌రకూ టేబుల్ ఫ్రాఫిట్ సంపాదించుకునే అవ‌కాశం ఉంద‌ని తెలుస్తోంది. అయితే నిర్ణ‌యం మాత్రం గోపీచంద్ కే వ‌దిలేశార్ట. గోపీచంద్ ఓకే అంటే.. ఈ సినిమా అమేజాన్ కి వెళ్తుంది. లేదంటే థియేట‌రిక‌ల్ రిలీజ్ కోసం ఎదురు చూడాల్సిందే.
