బుల్లితెరపై యాంకర్లుగా పనిచేసినవారు వెండితెరపై హీరోయిన్లుగా ప్రమోట్‌ అవుతుండడం మామూలే. ఉదయభాను కూడా ఓ సినిమాలో హీరోయిన్‌గా నటించిందిగానీ, సినిమాల్లో రాణించలేకపోయింది. ఝాన్సీ అప్పుడప్పుడూ సినిమాల్లో నటిస్తుంటుంది. సుమ కూడా ఓ సినిమాలో హీరోయిన్‌గా నటించింది, ఆ తర్వాత మళ్ళీ అలాంటి ప్రయత్నాలు చేయలేదు. వీళ్ళంతా సీనియర్లు. కలర్స్‌ స్వాతి, శ్రీదివ్య, రేష్మ రాథోడ్‌ వంటి బుల్లితెర భామలు వెండితెరపై హీరోయిన్లుగా పలు సినిమాల్లో కనిపించారు. ఈ మధ్యనే రేష్మి కూడా హీరోయిన్‌ అయ్యింది. అయితే అంతకుముందే ఆమె వెండితెరకు పరిచయం, ఆ తర్వాత ఆమె బుల్లితెరపై పాపులర్‌ అయి, సినిమాల్లో మళ్ళీ హీరోయిన్‌గా ఎంట్రీ ఇచ్చింది. ఈ కోవలోనే తాజాగా శ్రీముఖి కూడా హీరోయిన్‌ అవబోతోందట. అయితే ఇప్పటికే ఆమె పలు సినిమాల్లో నటించింది. హీరోయిన్‌గా మాత్రం కాదు. ఈసారి హీరోయిన్‌ అవుతోంది శ్రీముఖి. సినీ నటుడు హర్షవర్ధన్‌, దర్శకుడుగా మారి రూపొందించనున్న సినిమాలో హీరోయిన్‌గా శ్రీముఖిని ఎంపిక చేశారట. హర్షవర్ధన్‌ నటుడే కాదు, మంచి రచయిత కూడా. ఎక్కువగా కమెడియన్‌ పాత్రల్లోనే హర్షవర్ధన్‌ నటించాడు. డిఫరెంట్‌ వాయిస్‌ మాడ్యులేషన్‌తో ఉంటుందతని కామెడీ. ఈ నటుడు దర్శకుడిగా తొలి ప్రయత్నంతోనే హిట్‌ కొట్టాలనుకుంటున్నాడు.