సినిమా సినిమాకీ మహేష్ స్టైల్ మారిపోతుంటుంది. అయితే ఆ మార్పు మోతాదు త‌క్కువే. లుక్‌లో చిన్న చిన్న మార్పులు చోటు చేసుకుంటాయంతే. అయితే ఈసారి మాత్రం మహేష్ త‌న స్టైల్‌ని పూర్తిగా మార్చేయ‌బోతున్న‌ట్టు తెలుస్తోంది. ట్రెండీ అవ‌తారంలో ఆయ‌న తెర‌పై ద‌ర్శ‌న‌మిస్తార‌ని అర్థ‌మ‌వుతోంది. మహేష్ కొత్త సినిమా `స‌ర్కారు వారి పాట` టైటిల్‌ని చిత్ర‌బృందం అధికారికంగా ప్ర‌క‌టించింది. సూప‌ర్‌స్టార్ కృష్ణ పుట్టిన‌రోజుని పుర‌స్క‌రించుకుని ఈరోజే టైటిల్ బ‌య‌టికొచ్చింది.
అందులో మహేష్ లుక్‌ని కూడా చూచాయ‌గా చూపించారు. అయితే ఇదివ‌ర‌కెప్పుడూ క‌నిపించ‌నంత కొత్త‌గా ఆయ‌న లుక్ రూపుదిద్దుకుంది. మెడ‌పై టాటూ, చెవికి పోగు... ఇలా ట్రెండీగా ద‌ర్శ‌న‌మిస్తున్నాడు మహేష్. దీన్నిబ‌ట్టి మహేష్ స‌ర్కారువారి పాట... ఓ ట్రెండీ ఆట అని స్ప‌ష్ట‌మ‌వుతోంది. పేరు ఊర‌మాస్‌గా ఉంది కాబ‌ట్టి ఈ క‌థ కూడా ఆ కోవ‌లోనే సాగుతుంద‌ని సమాచారం. విశ్వ‌స‌నీయ వ‌ర్గాల సమాచారం ప్ర‌కారం ఈ చిత్రంలో కొన్ని స‌న్నివేశాల్లో ప్లే బాయ్ త‌ర‌హాలో క‌నిపిస్తార‌ని తెలిసింది. ప‌ర‌శురామ్ ద‌ర్శ‌క‌త్వంలో తెర‌కెక్కుతున్న చిత్ర‌మిది. `గీత గోవిందం` త‌ర్వాత ప‌ర‌శురామ్ తెర‌కెక్కిస్తున్న సినిమా ఇదే.
