ముద్దుగుమ్మ మెహరీన్‌ కౌర్‌ ప్రస్తుతం జోరు కొనసాగిస్తోంది. అమ్మడు వరుసగా రెండు సినిమాలతో వచ్చింది ఇటీవల. ఆ రెండు సినిమాలు బాక్సాఫీస్‌ వద్ద వసూళ్లు కొల్లగొడుతున్నాయి. 'మహానుభావుడు' సినిమాతో శర్వానంద్‌తో నటించింది. అప్పటికే సక్సెస్‌ల మీదున్న శర్వానంద్‌ ఈ సినిమాతో సక్సెస్‌ని కంటిన్యూ చేశాడు. రవితేజ హీరోగా దీపావళికి విడుదలైన 'రాజా ది గ్రేట్‌'తో మరో హిట్‌ అందుకుందీ బ్యూటీ. లాంగ్‌ గ్యాప్‌ తర్వాత వచ్చి, రవితేజ మంచి హిట్‌ కొట్టాడు ఈ సినిమాతో. అందులో అమ్మడు మెహరీన్‌ గోల్డెన్‌ లెగ్‌ ఉందనడంలోనూ అతిశయోక్తి కాదు. అలా ఈ బ్యూటీ లక్‌ ఈ రెండు సినిమాలనీ సూపర్‌ హిట్స్‌ చేసేసింది. ఇప్పుడు ఆ వంతు మరో యంగ్‌ హీరోది. ఆ యంగ్‌ హీరో మరెవరో కాదు సందీప్‌ కిషన్‌. సందీప్‌ కిషన్‌ - మెహరీన్‌ జంటగా తెరకెక్కుతోన్న చిత్రం 'కేరాఫ్‌ సూర్య'. ఈ సినిమా తమిళ, తెలుగు భాషల్లో విడుదలవుతోంది. సందీప్‌ కిషన్‌ మంచి నటుడు. ఒక్క హిట్‌ పడితే మనోడి దశ తిరిగిపోయినట్లే. 'వెంకటాద్రి ఎక్స్‌ప్రెస్‌' సినిమా తర్వాత సందీప్‌కి చెప్పుకోదగ్గ హిట్స్‌ లేవు. ఇటీవలే 'శమంతక మణి' సినిమాతో వచ్చినప్పటికీ, అది మల్టీ స్టారర్‌ ఖాతాలోకి వెళ్లిపోయింది. సో సందీప్‌ ఆశలన్నీ ఇప్పుడు 'కేరాఫ్‌ సూర్య' పైనే. సుశీంద్రన్‌ దర్శకత్వంలో ఈ సినిమా తెరకెక్కుతోంది. నవంబర్‌ 10న ప్రేక్షకుల ముందుకు రానుంది. లక్కీ బ్యూటీ మెహరీన్‌ ద్వారా సందీప్‌ హిట్‌ అందుకుంటాడో లేదో చూడాలి మరి.