తెలుగులో 'ఝుమ్మంది నాదం' సినిమాతో క్యూట్‌గా తన సినీ ప్రయాణం మొదలుపెట్టింది ముద్దుగుమ్మ తాప్సీ. యంగ్‌ హీరోలతో పాటు, స్టార్‌ హీరోలతో కూడా పలు చిత్రాల్లో నటించింది. కానీ జస్ట్‌ బబ్లీ గాళ్‌ తాప్సీ అందంగా ఉంటుంది అంటూ గ్లామర్‌ పాత్రలకే సెట్‌ అవుతుంది అంటూ టాలీవుడ్‌ ఈమె టాలెంట్‌ని పెద్దగా గుర్తించలేదు. అందుకే సైలెంట్‌గా బాలీవుడ్‌కి ఎంట్రీ ఇచ్చింది. అక్కడ మాత్రం స్టార్టింగ్‌ నుండీ మంచి సినిమాలతో ఆకట్టుకుంటోంది. అక్కడ ఇప్పుడు స్టార్‌ హీరోయిన్‌ రేంజ్‌కి తాప్సీ చేరుకునే దారి అతి తొందర్లోనే ఉందంటే అతిశయోక్తి కాదు. అలాంటి గుర్తింపు ఉన్న సినిమాల్లో ఆఫర్స్‌ దక్కించుకుంటోంది. తాప్సీ నటించిన 'పింక్‌', బేబీ' సినిమాలు ఘన విజయాన్ని సాధించాయి. ఈ సినిమాలు తాప్సీని మంచి నటిగా నిలబెట్టాయి. తాప్సీ హీరోయిన్‌గా వస్తోన్న 'నామ్‌ షబానా' సినిమాలో తాప్సీ యాక్షన్‌ సీన్స్‌ అదరగొట్టేసిందట. తాజాగా విడుదలైన ఈ సినిమా మేకింగ్‌ టీజర్‌కి మంచి రెస్పాన్స్‌ వస్తోంది. ఈ టీజర్‌లోని తాప్సీ యాక్షన్‌ టాలెంట్‌కి ప్రశంసలతో ముంచెత్తేస్తున్నారు సినీ ప్రముఖులు. ఈ నెల 10న ఈ సినిమా ట్రైలర్‌ విడుదల చేయనున్నట్లు చిత్ర యూనిట్‌ తెలిపింది. తాప్సీ గతంలో నటించిన 'బేబీ' సినిమాకి ప్రీక్వెల్‌గా తెరకెక్కుతోన్న చిత్రమే 'నామ్‌ షబానా'. మరో పక్క తాప్సీ ఈ సినిమాను తెలుగులో విడుదల చేసే యోచనలో ఉన్నట్లు తెలుస్తోంది. ఒకవేళ అదే జరిగితే తాప్సీ టాలెంట్‌ని తెలుగు ప్రేక్షకులు కూడా గుర్తించడం ఖాయం.