హ‌నుమాన్ తో వంద కోట్ల హీరో అయిపోయాడు తేజా స‌జ్జా. ఈ సినిమాలో హ‌నుమంతు పాత్ర‌లో తేజా ఒదిగిన విధానం అంద‌రికీ న‌చ్చేసింది. ఈ విజ‌యంతో తేజా కూడా క్రేజీ హీరోల్లో ఒక‌డిగా మారిపోయాడు. అయితే.. 'హ‌నుమాన్‌'తో తేజాని సూప‌ర్ హీరోగా మార్చేసిన ద‌ర్శ‌కుడు ప్ర‌శాంత్ వ‌ర్మ‌.. ఇప్పుడు సూప‌ర్ షాక్ ఇచ్చాడు. హ‌నుమాన్ కు సీక్వెల్ గా తీస్తున్న 'జై హ‌నుమాన్‌'లో తేజా హీరో కాద‌ట. మ‌రో సూప‌ర్ హీరోని తీసుకురాబోతున్నాడ‌ట‌. 'జై హ‌నుమాన్‌' క‌థంతా హ‌నుమాన్ చుట్టూ తిరుగుతుందని, ఆ పాత్ర‌లో ఓ స్టార్ హీరోని చూపించ‌బోతున్నాన‌ని క్లారిటీ ఇచ్చాడు ప్ర‌శాంత్ వ‌ర్మ‌.

ఈ సీక్వెల్ లో తేజా స‌జ్జా క‌నిపిస్తాడు కానీ, అత‌ని పాత్ర‌కు అంత‌గా ప్రాధాన్యం ఉండ‌ద‌ని తెలుస్తోంది. హ‌నుమంతుడిగా ఎవ‌రు క‌నిపిస్తార‌న్న‌ది ఇప్పుడు కీల‌కంగా మారింది. 2025లో 'జై హ‌నుమాన్‌' ప్రేక్ష‌కుల ముందుకు రాబోతోంది. అంటే ఈ యేడాదే ఈ చిత్రం సెట్స్‌పైకి వెళ్లాలి. అయితే ఈ లోగా ప్ర‌శాంత్ వ‌ర్మ 2 సినిమాలు పూర్తి చేస్తాడ‌ట‌. త‌న ద‌ర్శ‌క‌త్వంలో 'అధీర‌' అనే ఓ చిత్రం ఆమ‌ధ్య సెట్స్‌పైకి వెళ్లింది. దాంతో పాటు 'మ‌హాకాళి' అనే ఓ సినిమా చేయ‌బోతున్నాడు ప్ర‌శాంత్ వ‌ర్మ‌. ఇది పూర్తిగా లేడీ ఓరియెంటెడ్ సినిమా అని తెలుస్తోంది. పూర్తి వివ‌రాలు త్వ‌ర‌లో తెలుస్తాయి.