సూపర్ స్టార్ మహేష్ బాబు 'సరిలేరు నీకెవ్వరు' సినిమా ఘన విజయం తర్వాత పరుశురామ్ దర్శకత్వంలో 'సర్కారు వారి పాట' అనే సినిమాలో నటించేందుకు గ్రీన్ సిగ్నల్ ఇచ్చారు. ఇప్పటికే ఈ సినిమా ఫస్ట్ లుక్ కూడా రిలీజ్ అయింది. ఈ సినిమాకు కెరీర్ బెస్ట్ ఫామ్ లో ఉన్న థమన్ ను సంగీతదర్శకుడిగా ఎంచుకున్నారు.
తాజా సమాచారం ప్రకారం ప్రస్తుతం థమన్ ఈ సినిమాకు ట్యూన్లు కంపోజ్ చేయడంలో బిజీగా ఉన్నారట. దర్శకుడు పరశురామ్ తో కలిసి ట్యూన్స్ ఫైనలైజ్ చేస్తున్నారని, సినిమా కథకు తగ్గట్టుగా అందులోని సందర్భాలకు తగ్గట్టుగా ట్యూన్స్ ఎంచుకుంటున్నారని సమాచారం. ఈమధ్య థమన్ సంగీతం ప్రేక్షకులను భారీగా మెప్పిస్తోంది. ముఖ్యంగా థమన్ సంగీతం అందించిన 'అల వైకుంఠపురములో' సినిమా పాటలు సంగీత ప్రియులను ఉర్రూతలూగిస్తున్నాయి. యూట్యూబ్ లో బిలియన్ల కొద్దీ వ్యూస్ నమోదు చేస్తున్నాయి. దీంతో మహేష్ బాబు సినిమా సంగీతంపై కూడా అంచనాలు రెట్టింపయ్యాయి. ప్రేక్షకుల అంచనాలను అందుకునే విధంగా థమన్ ఈ సినిమా ట్యూన్లను కంపోజ్ చేస్తున్నారని అంటున్నారు.
మహేష్ బాబు సినిమాకు పనిచేయడం థమన్ కు ఇది మొదటి సారేమీ కాదు. గతంలో 'దూకుడు' సినిమాకు థమన్ సూపర్ హిట్ మ్యూజిక్ అందించారు. 'బిజినెస్ మేన్' సినిమాకు కూడా థమన్ అందించిన సంగీతం ప్రేక్షకులను మెప్పించింది. ఈసారి థమన్ సూపర్ స్టార్ సినిమాకు ఎలాంటి సంగీతం అందిస్తారో వేచి చూడాలి.
