హీరోల్ని దృష్టిలో ఉంచుకొని కథలు రాసుకోవడం ఒక పద్ధతైతే, కథ రాశాక....దానికి తగిన హీరోల్ని వెదుక్కొనే ప్రోసెస్ మరోటి. అగ్ర దర్శకులు సాధారణంగా మొదటి పద్ధతినే ఫాలో అవుతారు. త్రివిక్రమ్ మాత్రం రెండూ చేస్తాడు. అందుకే అతన్నుంచి `అ.ఆ`లాంటి సినిమాలొచ్చాయి. అగ్ర హీరోలతో సినిమాలు చేసే సమయంలో నితిన్తో ప్రాజెక్ట్ చేయాల్సిన పనిలేదు త్రివిక్రమ్ కి. కానీ... `అ.ఆ` కథ నితిన్కి సూటవుతుందని అనిపించడంతో.. నితిన్ తో ఆ సినిమా పట్టాలెక్కించాడు. మంచి హిట్ కూడా అందుకొన్నాడు. ఆ సమయంలోనే నానితోనూ త్రివిక్రమ్ ఓ సినిమా చేస్తారని వార్తలొచ్చాయి. సినిమాకీ, సినిమాకీ మధ్య త్రివిక్రమ్ కి ఎక్కువ గ్యాప్లు రావడం సహజంగా జరిగే విషయమే. ఇలాంటప్పుడే... ఓ మీడియం సైజు ప్రాజెక్ట్ ని పట్టాలెక్కిస్తే బాగుంటుందని త్రివిక్రమ్ భావించేవాడు. ఆయన దగ్గర ఓ కథ కూడా రెడీగా ఉంది. అది నానికి పర్ఫెక్ట్ గా సరిపోతుంది. ఆ టైమ్ లోనే నానికి త్రివిక్రమ్ ఈ కథ వినిపించాడు కూడా.
అయితే సమస్య ఎక్కడ వచ్చిందంటే... ఇది సోలో హీరో కథ కాదు. ఇది మల్టీస్టారర్ సినిమా. నానితో పాటుగా మరో హీరో కూడా కావాలి. శర్వానంద్, నితిన్, నాగశౌర్య.. ఇలా యంగ్ హీరోలైతే ఆ కథకు బాగుంటుంది. తమిళం నుంచి కార్తి, ఆర్య లాంటి హీరోల పేర్లూ పరిశీలించారు. కానీ.. అనివార్య కారణాల వల్ల ఈ ప్రాజెక్టు ఆగిపోయింది. ``త్రివిక్రమ్ నాతో ఓ సినిమా చేస్తానని చెప్పారు. కానీ.. కుదర్లేదు. తప్పకుండా ఫ్యూచర్లో ఓ సినిమా చేస్తాం. అది నా కెరీర్ని మలుపు తిప్పే ప్రాజెక్టు అవుతుంది`` అని ఈమధ్య ఓ ఇంటర్వ్యూలో చెప్పుకొచ్చాడు నాని. త్రివిక్రమ్ దగ్గర ఆ మల్టీస్టారర్ స్టోరీ ఇంకా ఉంది. కాకపోతే.. తన దృష్టి ఇప్పుడు పాన్ ఇండియా స్థాయి హీరోలపై, అలాంటి కథలపై ఉంది. దాంతో మల్టీస్టారర్ పట్టాలెక్కడం కష్టమే. కాకపోతే.. ఈ కథని వేరే దర్శకుడి చేతిలో పెట్టి, సినిమాగా చూడాలన్నది త్రివిక్రమ్ ఆలోచన. అలాగైనా సరే, త్రివిక్రమ్ కథ బయటకు వస్తుందేమో చూడాలి.