మ‌ల‌యాళ చిత్రం `అయ్య‌ప్ప‌యుమ్ కోషియ‌మ్‌` సినిమా రీమేక్ పై గ‌త కొంత‌కాలంగా టాలీవుడ్ లో విప‌రీత‌మైన చ‌ర్చ న‌డుస్తోంది. బాల‌కృష్ణ‌, రానా, ర‌వితేజ‌.. ఇలా చాలామంది హీరోల పేర్లు ఈ రీమేక్ కోసం వినిపించాయి. ఈ సినిమా సెట్స్‌పై వెళ్ల‌డం దాదాపుగా ఖాయ‌మైపోయిందన్నారు కూడా. అయితే ఇప్ప‌టి వ‌ర‌కూ అధికారిక ప్ర‌క‌ట‌న ఏదీ రాలేదు. ఇప్పుడు ఈ రీమేక్‌లో కొత్త ట్విస్ట్ వ‌చ్చింది. ఈ సినిమాని ఇటీవ‌ల ప‌వ‌న్ క‌ల్యాణ్ చూశాడ‌ని, ఈ సినిమాలో న‌టించ‌డానికి ఆస‌క్తి చూపిస్తున్నాడ‌న్న‌ది ఇండ్ర‌స్ట్రీ వ‌ర్గాల టాక్‌. ఒక‌వేళ ప‌వ‌న్ గ‌నుక ఒప్పుకుంటే.. ఈ సినిమా రేంజ్ మ‌రో స్థాయిలో ఉంటుంది.

ఈ సినిమా హ‌క్కుల్ని హారిక హాసిని సంస్థ చేజిక్కించుకున్న సంగ‌తి తెలిసిందే. అటు హారిక‌కీ, ఇటు ప‌వ‌న్‌కీ త్రివిక్ర‌మ్ అత్యంత స‌న్నిహితుడు. అందుకే.. ఈ సినిమా రీమేక్ విష‌యంలో త్రివిక్ర‌మ్ మ‌ధ్య‌వ‌ర్తిత్వం వ‌హిస్తున్నాడ‌ని, త్రివిక్ర‌మ్ ప‌వ‌న్‌ని ఒప్పించ‌డం ఖాయ‌మ‌ని చెబుతున్నారు. అయితే ఈ సినిమాకి త్రివిక్ర‌మ్ ద‌ర్శ‌క‌త్వం వ‌హించ‌డ‌ట‌. ఆ బాధ్య‌త మ‌రొక‌రికి అప్ప‌గించే అవ‌కాశం ఉంద‌ని టాక్‌. మ‌రి... వేరెవ‌రో ద‌ర్శ‌క‌త్వం వ‌హిస్తే.. ప‌వ‌న్ న‌టించ‌డానికి అంగీక‌రిస్తాడా?  చేతిలో ఇన్ని సినిమాలు ఉండ‌గా, మ‌రో రీమేక్‌కి ముందుకొస్తాడా అన్న‌ది తేలాలంటే ఇంకొన్నాళ్లు ఆగాలి.