తెలుగబ్బాయి విశాల్‌ తమిళంలో స్టార్‌ హీరో. తెలుగులో కూడా మంచి పాపులారిటీ ఉంది. డైరెక్ట్‌ తెలుగు సినిమాలు చేయకపోయినా విశాల్‌ని తెలుగు ప్రేక్షకులు బాగా ఆదరిస్తారు. అందుకే ఎప్పట్నుంచో తెలుగులో డైరెక్ట్‌ సినిమాకి ప్లాన్‌ చేస్తూనే ఉన్నాడు విశాల్‌. కానీ కుదరడం లేదు. అయితే ఇప్పుడు మనోడు మలయాళంలో సత్తా చాటడానికి రెడీ అవుతున్నాడు. మలయాళ సూపర్‌ స్టార్‌ మోహన్‌లాల్‌ నటించే కొత్త సినిమాలో విశాల్‌ విలన్‌గా నటిస్తాడట. కొన్ని రోజులుగా ఈ గాసిప్స్‌ వినవస్తున్నా ఇదిప్పుడు కన్‌ఫామ్‌ అయ్యింది. ముందు తటపటాయించిన విశాల్‌, చివరికి ఓకే చెప్పాడట. ఎందుకంటే ఈ పాత్ర అంత పవర్‌ఫుల్‌గా ఉండబోతోందట. అలాగే విలన్‌ పాత్రలో విశాల్‌కి మంచి గుర్తింపు రానుందట. అందుకే ఆలోచించి ఈ పాత్రకు ఓకే చెప్పేశాడట విశాల్‌. అంతేకాదు ఈ పాత్ర కోసం విశాల్‌, మోహన్‌లాల్‌ వద్ద నుంచి కొన్ని సూచనల్ని కూడా స్వీకరించాడని సమాచారమ్‌. మలయాళ, తమిళ, తెలుగు బాషల్లో ఈ సినిమా ఒకేసారి విడుదలవుతుందట. ఇప్పటికే తెలుగులో 'మనమంతా', జనతా గ్యారేజ్‌' సినిమాలతో మోహన్‌లాల్‌ తెలుగు ప్రేక్షకులకు బాగా దగ్గరయ్యాడు. అంతేకాదు మోహన్‌లాల్‌ డబ్బింగ్‌ సినిమా అయినా కానీ 'మన్యం పులి' సినిమా కూడా తెలుగులో మంచి కలెక్షన్లు సాధించింది. అందుకే తెలుగులో ఇంత మంచి మార్కెట్‌ పెంచుకున్న మోహన్‌లాల్‌, ఈ సినిమాని తెలుగు నేటివిటీకి తగ్గట్టుగా ప్లాన్‌ చేశాడంటున్నారు.
