ఈ నెల 24న ప్రేక్షకుల ముందుకు వచ్చింది అజిత్‌ హీరోగా నటించిన 'వివేకం'. ఈ సినిమా టెక్నికల్‌గా హాలీవుడ్‌ స్థాయిలో తెరకెక్కిన సంగతి తెలిసిందే. శివ దర్శకత్వంలో తెరకెక్కింది 'వివేకం'. విడుదలైన రెండు రోజుల్లోనే ప్రపంచ వ్యాప్తంగా 66 కోట్ల వసూళ్లు రాబట్టింది ఈ సినిమా. తొలి రోజు మిశ్రమ టాక్‌ని సొంతం చేసుకున్నప్పటికీ, వసూళ్ల విషయంలో రాకెట్‌లా దూసుకెళ్తోందనే చెప్పాలి. ప్రపంచ వ్యాప్తంగా 3000 స్క్రీన్లలో విడుదలైన ఈ సినిమా, విదేశాల్లోనూ వసూళ్లు పిచ్చెక్కించేస్తోంది. తొలి రోజులోనే విదేశాల్లో 7.25 కోట్లు సాధించిందని ట్రేడ్‌ పండితులు లెక్క తేల్చారు. ఇక ఇండియాలో అయితే ఈ సినిమాకి తిరుగే లేకుండా పోయింది. రెండు రోజుల్లోనే ఈ లెక్కలు ఇలా ఉంటే, ఈ వారం తిరిగేసరికి 100 కోట్ల వసూళ్లు రాబడుతుందనడంలో అతిశయోక్తి కాదంటున్నారు సినీ విశ్లేషకులు. విడుదలకు ముందే ఈ సినిమా బిజినెస్‌ సెన్సేషన్‌ అయ్యింది. విడుదలయ్యాక బాక్సాఫీస్‌ వసూళ్ల వర్షంతో కళకళలాడుతోంది. కాజల్‌ అగర్వాల్‌, అక్షరా హాసన్‌ హీరోయిన్లుగా నటించారు ఈ సినిమాలో. బాలీవుడ్‌ నటుడు వివేక్‌ ఒబెరాయ్‌ విలన్‌గా నటించాడు. ప్రత్యేకమైన యాక్షన్‌ సీన్స్‌ సినిమాకి హైలైట్‌ అని చెప్పొచ్చు. అజిత్‌ యాక్టింగ్‌, హాలీవుడ్‌ రేంజ్‌ యాక్షన్‌ సీన్స్‌, వారెవ్వా అనిపించే లొకేషన్లు అన్నీ వెరసి అజిత్‌ ఈ సినిమా కోసం పడ్డ కష్టం వృధా పోలేదు. సినిమాకి మంచి విజయం దక్కింది. ప్రేక్షకుల నుండి మంచి ఆదరణ దక్కుతోంది 'వివేకం' సినిమాకి.