విజయ్ దేవేరకొండ- పెళ్ళీ చూపులు, అర్జున్ రెడ్డి చిత్రాలతో తెలుగు ప్రేక్షకులని తన వైపుకి తిప్పుకున్న ఈ హీరో ఇప్పుడు తెలుగు ఇండస్ట్రీలో మోస్ట్ వాంటెడ్ హీరో.
దీనితో ఇప్పుడు ఇతగాడు ఎలాంటి సినిమాలు చేస్తాడు? ఎటువంటి దర్శకులతో పని చేస్తాడు? వంటి ప్రశ్నలు ఉదయిస్తున్న తరుణంలో.. విజయ్ దేవరకొండ ఒకరకంగా అందరికి షాక్ ఇచ్చాడు అనే చెప్పాలి. అదేలా అనగా- విజయ్ దేవరకొండని తెలుగు తెరకి పరిచయం చేసిన దర్శకుడు శేఖర్ కమ్ముల. లైఫ్ ఇజ్ బ్యూటిఫుల్ చిత్రంలో ఒక సహాయ నటుడు పాత్రలో విజయ్ మెరిసాడు.
ఆ తరువాత ఆ చిత్రానికి పనిచేసిన సహాయ దర్శకుడు నాగ్ అశ్విన్ దర్శకుడిగా మారి ఎవడే సుబ్రహ్మణ్యంలో విజయ్ కి మెయిన్ రోల్ ఇచ్చాడు. ఇలా సాగిన ప్రస్థానంలో మళ్ళీ విజయ్-శేఖర్ లు కలిసి ఒక చిత్రం చేయబోతున్నారు.
ఇప్పటికే శేఖర్ చెప్పిన కథ విజయ్ కి నచ్చిందని, ఈ సినిమాని విజయ్ సొంత నిర్మాణ సంస్థలోనే నిర్మిస్తారని కూడా తెలుస్తున్నది. శేఖర్ సినిమా తీసే విధానానికి విజయ్ నటించే విధానానికి చాలా తేడా ఉంటుంది. మరి వీరు కలిసి సినిమా చేస్తే ఎలా అనేది ఇప్పుడు ఆసక్తిగా మారిన అంశం.
చూద్దాం.. ఈ డిఫరెంట్ కాంబినేషన్ ఎలా పండనుందో!!
