ఈమ‌ధ్య ఎందుకో ద‌ర్శ‌కుల రేసులో బాగా వెన‌క‌బ‌డిపోయాడు వి.వి.వినాయక్. టాప్ డైరెక్ట‌ర్ అయినా, ఇండ్ర‌స్ట్రీ హిట్లు ఇచ్చినా వినాయ‌క్‌ని ఎవ‌రూ ప‌ట్టించుకోక‌పోవ‌డం ఆశ్చ‌ర్యాన్ని క‌లిగిస్తోంది. అయితే... క‌థ‌లు రెడీ చేసుకోక‌పోవ‌డం వ‌ల్ల, రిలాక్డ్స్ అయిపోవ‌డం వ‌ల్లే వినాయక్ సినిమాలు చేయ‌లేక‌పోతున్నాడ‌న్న ఓ టాక్ ఉంది. దాన్ని చెరిపేసే ప‌నిలో త‌న క‌స‌ర‌త్తులు ముమ్మ‌రం చేశాడు వినాయక్. చిరంజీవితో `లూసీఫ‌ర్‌` రీమేక్‌ని ఓకే చేసుకున్న వినాయక్, నంద‌మూరి బాల‌కృష్ణ కోసం ఓ క‌థ ని సిద్ధం చేసే ప‌నిలో ఉన్నాడు. ఇవి రెండూ కాకుండా మ‌రి కొన్ని క‌థ‌ల్ని కూడా రెడీ చేస్తున్నాడ‌ట.
అందులో ఒక‌టి రామ్ చ‌ర‌ణ్ కోస‌మ‌ని టాక్. రామ్ చ‌ర‌ణ్ - వినాయక్ కాంబోలో `నాయ‌క్` వ‌చ్చింది. మంచి విజ‌యాన్ని అందుకుంది. ఈ కాంబో మ‌ళ్లీ ప‌ట్టాలెక్కే అవ‌కాశాలున్నాయ‌ని తెలుస్తోంది. అయితే ఈసారి.. చ‌ర‌ణ్ కోసం ఓ రీమేక్ క‌థ‌ని ఎంచుకోవాల‌నుకుంటున్నాడ‌ట. చిరు సూప‌ర్ హిట్ సినిమాని వినాయక్ రీమేక్ చేయాల‌నుకుంటున్నాడ‌ని టాక్. చర‌ణ్‌కి ఎప్ప‌టి నుంచో `గ్యాంగ్ లీడర్`ని రీమేక్ చేయాల‌ని వుంది. వినాయ‌క్‌కూడా ఆ సినిమాపైనే ఫోక‌స్ పెట్టాడ‌ని టాక్. టాలీవుడ్ లో ఓ స్టార్ రైట‌ర్ గ్యాంగ్ లీడర్ ని ఈత‌రానికి నచ్చేలా రాస్తున్నాడ‌ని, అన్నీ ఓకే అయితే ఆ సినిమా చ‌ర‌ణ్ తో తీస్తార‌ని తెలుస్తోంది.
