ఒకప్పుడు అల్లరి నరేష్‌ సినిమాలంటే మినిమమ్‌ గ్యారంటీ అనుకునేవారు దర్శక నిర్మాతలు. కానీ ఇప్పుడలా కాదు. అల్లరోడి స్థాయికి తగ్గ సక్సెస్‌ కొట్టి చాలా కాలమే అయ్యింది. ఏది పట్టినా బంగారమయ్యే అల్లరి నరేష్‌కి ఈ మధ్య కాలం కలిసి రావడం లేదు. క్యాజువల్‌గా నరేష్‌ చేసే కామెడీకి బోరెత్తిపోయారు ప్రేక్షకులు. దాంతో కొంచెం కొత్తగా అంటూ హారర్‌ కామెడీని కూడా ట్రై చేసేశాడు నరేష్‌ 'ఇంట్లో దెయ్యం నాకేం భయం' సినిమాతో. అది కూడా బెడిసికొట్టడంతో, ఇప్పుడు మళ్లీ కొత్త అల్లరి ప్లాన్‌ చేయబోతున్నాడట. 

'సుడిగాడు' వంటి బిగ్గెస్ట్‌ హిట్‌ ఇచ్చిన భీమినేని శ్రీనివాస్‌తో ఓ సినిమా చేయబోతున్నాడు. ఈ రోజే లాంఛనంగా ప్రారంభమైంది ఈ సినిమా. ఈ సినిమాతో ఎలాగైనా హిట్‌ కొట్టాలనే కసితో ఉన్నాడు అల్లరి నరేష్‌. అందుకోసం గతంలో తనకి బాగా కలిసొచ్చిన కామెడీ ట్రాక్‌నే ఈ సినిమాలో ఉపయోగించబోతున్నాడట. ముఖ్యంగా ఈ సినిమాలో చెప్పుకోదగ్గ విషయం ఏంటంటే, సునీల్‌ ఈ సినిమాలో కీలకపాత్రలో నటించబోతున్నాడనీ ప్రచారం జరుగుతోంది. సునీల్‌ కోసం ప్రత్యేకంగా ఓ క్యారెక్టర్‌ని డిజైన్‌ చేశాడట డైరెక్టర్‌ భీమినేని శ్రీనివాస్‌. 

ఇటీవలే సునీల్‌ 'టూ కంట్రీస్‌' సినిమాతో హీరోగా ప్రేక్షకుల ముందుకు వచ్చాడు. దురదృష్టవశాత్తూ సునీల్‌కి కూడా ఈ మధ్య కాలం కలిసి రావడం లేదు. ఆశించిన స్థాయిలో విజయం అందుకోలేకపోతున్నాడు. ప్రస్తుతం ఇటు అల్లరి నరేష్‌, అటు సునీల్‌ ఈ ఇద్దరి దారులు ఒకేలా ఉన్నాయనిపిస్తోంది సక్సెస్‌ విషయంలో. సో ఈ తరుణంలో ఈ హీరోలిద్దరూ కలిసి రంగంలోకి దూకితే, ఎలాంటి రిజల్ట్‌ని అందుకుంటారో చూడాలిక.