ప్లెజెంట్‌ కామెడీతో ఇప్పటిదాకా తెలుగు ప్రేక్షకుల్ని అలరించిన అవసరాల శ్రీనివాస్‌ ఈసారి 'చిలిపి కామెడీ'తో సత్తా చాటబోతున్నాడు. దర్శకుడిగా క్లీన్‌ సినిమాల్ని రూపొందించి తనదైన ప్రత్యేకతను చాటుకున్న అవసరాల శ్రీనివాస్‌, సోలో హీరోగా నటిస్తున్న తొలి సినిమానే 'చిలిపి కామెడీ'ని ఎంచుకోవడం డిఫరెంట్‌గా ఉంది కదా? బాలీవుడ్‌లో వచ్చిన 'హంటర్‌' సినిమాకి 'బాబు బాగా బిజీ' తెలుగు రీమేక్‌. ఈ సినిమాతో అవసరాల శ్రీనివాస్‌ నటుడిగా బాగా బిజీ అయిపోతాడని ఆశించొచ్చేమో. మిస్తి చక్రవర్తి, తేజస్వి మాదివాడ, సుప్రియ, శ్రీముఖి ఈ సినిమాలో ఇతర ప్రధాన తారాగణం. ఇంతమంది భామలతో 'బాబు' రొమాన్స్‌ అంటే ఆ కిక్కే వేరప్పా అనుకోవాల్సిందే. అయితే ఇది బూతు సినిమా అంటూ జరుగుతున్న ప్రచారాన్ని చిత్ర యూనిట్‌ ఖండిస్తోంది. ఇదో టైపు కామెడీ అనీ, చిలిపితనం ఉంటుందిగానీ వల్గారిటీ ఉండదని చిత్ర దర్శక నిర్మాతలు చెబుతున్నారు. 'హంటర్‌' సినిమా చూసినవారు మాత్రం అవసరాల ఇలాంటి సినిమాలు చేయడం అవసరమా? అని కూడా ప్రశ్నించడం చూస్తున్నాం. ఏదేమైనప్పటికీ సినిమా చూస్తేనేగానీ ఓ అంచనాకి రాలేం. నటుడిగా అవసరాల గత సినిమాలు, దర్శకుడిగా ఆయన రూపొందించిన సినిమాలు చూసుకుంటే, ఇబ్బంది పెట్టే సన్నివేశాలు 'బాబు బాగా బిజీ' సినిమాలో ఉండకపోవచ్చేమో. మే 5న ఈ సినిమా ప్రేక్షకుల ముందుకు రానుంది.