నందమూరి నటసింహం బాలకృష్ణకు 'సింహా' సెంటిమెంట్‌ చాలా ఎక్కువ. గతంలో 'సింహా' పేరుతో వచ్చిన సినిమాలన్నీ సూపర్‌ హిట్సే బాలయ్య కెరీర్‌లో. 'సమర సింహారెడ్డి, 'సీమ సింహం', 'లక్ష్మీ నరసింహ', 'సింహా', 'నరసింహనాయుడు' తదితర చిత్రాలు సూపర్‌ డూపర్‌ హిట్స్‌. బాలయ్య ఏ సినిమా స్టార్ట్‌ చేసినా, ఆ సినిమాకి టైటిల్‌ ముందు సింహాతోనే స్టార్ట్‌ అవుతుందని ప్రచారం జరుగుతూ ఉంటుంది. బాలయ్య అంటే సింహా, సింహా అంటే బాలయ్య.. అంతగా సింహా టైటిల్‌ బాలయ్య సినిమాలకు పాపులర్‌ అయిపోయింది. తాజాగా తెరకెక్కుతోన్న బాలయ్య 102వ చిత్రానికీ 'సింహా'తోనే టైటిల్‌ ఆరంభం కానుందనీ ఎప్పటినుండో ప్రచారం జరుగుతోంది. ఆ ప్రచారం ఇప్పుడు నిజమైనట్లే. ఈ సినిమాకి 'జై సింహా' టైటిల్‌ని ఖరారు చేసింది చిత్ర యూనిట్‌. కె. ఎస్‌. రవికుమార్‌ ఈ చిత్రాన్ని తెరకెక్కిస్తున్నారు. నయనతార హీరోయిన్‌గా నటిస్తోంది. మరో ఇద్దరు ముద్దుగుమ్మలకీ ఈ సినిమాలో చోటుంది. వారే నటాషా జోషి, హరిప్రియ. 'జై సింహా' టైటిల్‌ పట్ల బాలయ్య అభిమానులు సంతృప్తి వ్యక్తం చేస్తున్నారు. సి. కళ్యాణ్‌ ఈ సినిమాకి నిర్మాతగా వ్యవహరిస్తున్నారు. ఈ సినిమా షూటింగ్‌ శరవేగంగా జరుగుతోంది. కాగా మరో పక్క బాలయ్య, తేజ డైరెక్షన్‌లో ఎన్టీఆర్‌ బయోపిక్‌లో నటిస్తున్నారు. ఈ సినిమా వచ్చే ఏడాది సెట్స్‌ మీదికి వెళ్లనుంది. స్వర్గీయ ఎన్టీఆర్‌ పాత్రలో బాలయ్య నటించబోతున్నారు. ఈ సినిమాకి స్క్రిప్టు పనులు జరుగుతున్నాయి. బాలయ్య స్వీయ నిర్మాణంలో ఈ సినిమా తెరకెక్కుతోంది.
