బాలకృష్ణ హీరోగా తెరకెక్కుతోన్న కొత్త చిత్రం 'జై సింహా'. ఈ సినిమా టైటిల్‌ లోగోని నవంబర్‌ 1న విడుదల చేయనున్నట్లు చిత్ర యూనిట్‌ ప్రకటించింది. బాలయ్యకి సెంటిమెంట్‌ అయిన సింహా టైటిల్‌తోనే ఈ సినిమా తెరకెక్కుతుండడం విశేషం. కె.యస్‌.రవికుమార్‌ డైరెక్షన్‌లో ఈ సినిమా తెరకెక్కుతోంది. ప్రస్తుతం సినిమా వైజాగ్‌లో షూటింగ్‌ జరుపుకుంటోంది. ఓ పవర్‌ఫుల్‌ సబ్జెక్ట్‌తో ఈ సినిమా తెరకెక్కుతోంది. పొలిటికల్‌ పంచ్‌ డైలాగులు ఈ సినిమాలో చాలా ఉంటాయట. పొలిటికల్‌ నేపథ్యం ఉన్న సన్నివేశాలు ఈ సినిమాలో ఎక్కువగా చూపించబోతున్నారనీ సమాచారమ్‌. నయనతార హీరోయిన్‌గా నటిస్తోంది. మరో ఇద్దరు ముద్దుగుమ్మలు నటాషా జోషి, హరిప్రియలు బాలయ్యతో జత కడుతున్నారు. కాగా ఈ సినిమాని సి.కళ్యాణ్‌ అత్యంత ప్రతిష్ఠాత్మకంగా నిర్మిస్తున్నారు. సినిమా సినిమాకీ గెటప్‌ ఛేంజ్‌ చేస్తుంటారు బాలయ్య. ఈ సినిమా కోసం బారు మీసాలతో కనిపిస్తున్నారు. 'పైసా వసూల్‌' సినిమాలో ట్రెండీగా కనిపించిన బాలయ్య ఈ సినిమాలో హుందాగా, కనిపిస్తూనే మరింత హ్యాండ్‌సమ్‌ లుక్‌తో ఆకట్టుకోనున్నారట. వైజాగ్‌ పరిసర ప్రాంతాల్లోనూ, కొన్ని ప్రత్యేకమైన సెట్స్‌లోనూ ఈ సినిమా ప్రస్తుతం షూటింగ్‌ జరుపుకుంటోంది. వచ్చే ఏడాది సంక్రాంతి బరిలో నిలిచిందీ సినిమా. బాలయ్యకి బాగా కలిసొచ్చే పండగ సంక్రాంతి. అందుకే సంక్రాంతి సందర్భంగా 'జై సింహా' జనవరి 12న ప్రేక్షకుల ముందుకు రానుంది. మరో పక్క బాలయ్య - తేజ కాంబినేషన్‌లో ఎన్టీఆర్‌ బయోపిక్‌ రానుంది. ఈ సినిమా జనవరిలోనే సెట్స్‌ మీదికి వెళ్లనుంది. ఈ సినిమాకి బాలయ్యే నిర్మాతగా వ్యవహరించనున్నారు.